Keshe aqparat agenttikteri «Qazteleradıo» kompanıasy aksıalarynyń tolyq paketi respýblıkalyq menshikke berilgeni jóninde habar taratty. Bir qaraǵanda, bul – menshikteý ıesi ıtteı sapyrylysqan eldegi qatardaǵy habar sıaqty estiledi. Biraq bile bilgenge – bunyń astarynda úlken saıası mán jatyr.

Ortalyq ofısi men negizgi tehnıkalyq qural-jabdyǵy Almaty qalasynda ornalasqan «Qazteleradıo» aksıonerlik qoǵamy – elde televızıa jáne radıo habarlaryn taratýdyń Ulttyq operatory sanalady. Efırlik sıgnaly búkil Qazaqstanǵa taraıtyn barsha otandyq «TV» men «RV» osy operatordyń qyzmetine múddeli. Eger Ulttyq operator tolqynnyń tutqasyn tartyp qalsa, «31-arna» men «KTK» túgili, «Habar» men «Qazaqstan» da qarań qalady. «Qazaq radıolary» men usaq-túıek radıo-telejáshikterdiń habar taratý dıapazony da osy operatordyń qyzmettik quzyryna táýeldi.

Al endi osy «Qazteleradıonyń» qyzmetinde qandaı «saıası mán» bolýy múmkin?
Tikeleı! Mánniń mánisi Toqaev myrzanyń prezıdenttik erik-jigerine tikeleı tireledi. Eger ol saılanǵan prezıdent retindegi róldiń retimen tikeleı efırge shyǵyp, «Kitaphanaǵa» kiriptar bolýǵa májbúr ekenin aıtyp, halyqtan qoldaý suraıtyn bolsa, eldegi ózgeriske ózeýregen jurtshylyq jóńkilip, alańǵa atyp shyǵýy ábden múmkin. (Eske salaıyq: «birinshi prezıdent», «Qaýipsizdik keńestiń» tóraǵasy degen jasandy laýazymdardy taqymyna tyǵyp, «Nur Otandy» jastanyp alǵan N.Nazarbaevtyń ákimshiligi «Birinshi prezıdenttiń kitaphanasy» dep atalatyn ǵımaratta otyr. Búginde astanalyq ısteblıshment qos bılikti «Aqorda» jáne «Kitaphana» dep ataıdy).

Al Toqaev myrza «jasandy» bılik ıesiniń saıası-ıntrıgalyq qıturqylyǵynan qutqarýǵa halyqtan arasha suraı ma, joq pa – ol endi basqa áńgimeniń taqyryby. Ázirge aıtpaǵymyz – buǵan deıin «Qazteleradıo» aksıonerlik qoǵamyna «birinshiniń» birinshi qyzy Darıǵa Nazarbaevanyń komandasy ıelik etip kelgen. Kompanıa paketiniń qomaqty bóligi de, oǵan basshylyq jasap otyrǵan menedjerler toby da – Darıǵa hanshaıymnyń «júgirmekteri» edi.
Taǵy bir eske salatyn jáıt – eldegi saıasatty sarnaıtyn «Habar», «KTK», «Evrazıa – Birinshi arna» TV-lary, basqa da tórt-bes «FM» radıolar Nazarbaevanyń nazarynda ekeni málim (shoý-dýmanǵa qatysy bar kódedeı kóp «RV-TV»-lardy aıtpaǵanda). Endi, mine, bulardyń barlyǵy bir kúnde habar taratý tehnıkasy jaǵynan memleketke táýeldi bolyp shyǵa keldi. Darıǵa dalada qaldy... ma?

Bul qandaı saıası qısapty bildiredi? QR prezıdenti Qasym-Jomart Toqaev óziniń «ókil ákesimen» tikeleı teketireske ketti me? Eldegi aqparat taratý keńistigine ıelik quzyry Nazarbaevtyń «Kitaphanasynan» Toqaevtyń «Aqordasyna» (ıaǵnı, memleketke) ótti me?

Álbette, bul suraqtardyń jaýabyn jýyq mańda bile almaspyz. Biletinimiz bir nárse – qalaı bolǵanda da, saılanǵan prezıdent Toqaev pen «bıliktiń basqynshysy» Nazarbaevtyń arasyndaǵy teketires birte-birte aıqyndala tústi. Oǵan bir mysal – Toqaevtyń Qytaıǵa sapary: burynǵy prezıdent Qytaıǵa barǵan saıyn, birer mıllıard qaryzdy qaltasyna sala keletin; Toqaev – «eki jaqqa ortaq bıznesti birlesip jasaıyq» dep qaıtty.
Toqaev barlyq kezdesýlerde qazaq jáne qytaı tilderinde ǵana sóıledi. Esik-tesikke kirgen jeriniń bárinde aýyz jappaı, tek qana oryssha sóıleıtin nazarbaevtyq dástúrdiń «aýzyn uryp qoıdy». Orysshalap aıtqanda: «Chem ne vyzov? Meloch, no prıatno...».

Bul eki arada Toqaev qytaı jerinde júrgende, Nazarbaev Máskeýge – Pýtınge «jaloba» jasap bardy: «el arasynda bedeli joq...» dep sypsyń qaǵyp. Bul da «vyzov»: «Aıaz, álińdi bil!» degen syńaıy. Toqaevtyń birte-birte halyqqa bet bura bastaǵan túri Nazarbaevtyń qyzylıt ishin kúıdirip barady...

Kórneý kózge kórine bermeıtin mundaı teketirestiń «túrleri» kún saıyn qylań berer túri bar. Biz árıne aısbergtiń ústin ǵana bilmeımiz: onyń astynda jan alyp, jan beristiń arpalysy júrip jatqany anyq. Ótkende prezıdenttiń apparat basshysy Qyrymbek Kósherbaev «senimnen shyqty» degen toqaevtyq toqetermen Shymkenttiń ákimin ornynan alyp tastady. Ol alǵashynda qańǵyp keterdeı kúıde edi, keıinnen nazarbaevtyq «Nur Otannyń» jıynynda jaınań qaǵyp otyrdy. Ol – ol ma, «senimnen shyqqan» adam kúni keshe premerdiń keńesshisi bolyp shyǵa keldi. Iaǵnı, bul teketireske toqaevtyq úkimettiń basshysy Mamın da tartyldy degen sóz. Bul endi «bolee sereznyı vyzov»: premer-mınıstr «Kitaphananyń» degenine moıynsundy degen sóz.

Al ekeýara eregestiń kókesi kesheli-beri bastaldy: Toqaev óziniń halyqqa joldaýynda beıbit jıyndarǵa erik berý kerek dedi; Nazarbaevtyń «jandarmerıasy» «sherýge shyqty», «DVK-ny qoldady» dep, azamattyq belsendilerdi taǵy da sottaı bastady. Aıdalǵandardyń alǵashqysy 15 kúndik abaqtyǵa tústi.

Túbin qýyp kelgende, bul tartystyń eki jaqqa da jóni bar: týmysynan toqpeıil Toqaev kórgen tálimine saı, shama-sharqy kelgenshe halyqqa qyzmet etip ketkisi bar; al tutas memleketten bastap, bir qalany óz atyna menshiktep alǵan Nazarbaevtyń joǵaltary kóp. Kim óziniń otyz jyl jıǵan-tergenin tegin taratyp bergisi bar deısiń?...

Qysqasy, qos ókimet qosarlanyp, uzaq júrýi múmkin emes: ne Nazarbaev taǵy bir qıturqy qımyldy bastaıdy; ne Toqaev bir kúni «jarylady». Negizi, qarsylasyna qaraǵanda, ishki dúnıesi áldeqaıda taza Qasekeńniń qastyqqa ushyramaı, halyq jaǵynda «jarylǵany» jaqsy bolar edi...
Kim bilsin?!

Ermurat Bapıdiń feısbýk paraqshasynan alyndy.