«Qazaqstan» qonaqúıiniń «Grand Ballroom» zalynda Almatydaǵy Shet tilder jáne iskerlik karera ýnıversıtetiniń uıymdastyrýymen aýyzashar ótkizildi. Igilikti sharaǵa Túrkıanyń Qazaqstandaǵy elshiliginiń qyzmetkerleri, qarjy salasynyń mamandary, ǵylym-bilim ordalarynyń ókilderi, halyqaralyq uıym qyzmetkerleri, aqsaqaldar men zıaly qaýym, barlyǵy eki júzden astam musylman qatysty. Bıylǵy orazada besinshi ret uıymdastyrylyp otyrǵan aýyzasharda eki eldiń dostastyǵyn nyǵaıtý nıetindegi bata-tilekter aıtylyp, ulaǵatty áńgimeler órbidi. Shet tilder jáne iskerlik karera ýnıversıtetiniń rektory, profesor, doktor Sabrı Hızmetlı musylmandar úshin erekshe sanalatyn bul aıda izgi isterdi kóbirek atqarýǵa shaqyrdy. Atalmysh oqý ornynyń qurylǵanyna bıyl 10 jyl tolyp otyr. Osy oraıda ýnıversıtette 2015-2016 oqý jylynda joǵary bal jınaǵan mektep túlekterine 105 grant bólindi. Kúndizgi bólimge túskender 10 % jeńildikpen oqı alady. Úzdik stýdentter Túrkıa men Qytaıdaǵy oqý oryndarynda grant negizinde stıpendıa alyp, oqýyn jalǵastyrady. Barlyǵy on úsh mamandyq boıynsha bilim beretin ýnıversıtette UBT-dan 80-85 bal alǵandarǵa 15% jeńildik, 86-90 bal bolsa 20 % , 90-99 bal alǵandarǵa 25%, 100 bal jáne odan joǵary bolsa 50% jeńildikter belgilengen. «Altyn belgi» ıeleri tórt jyl tegin oqytylady. Bıyl Sabrı Hızmetlıdiń bastamasymen ıgi isterdiń biri retinde jetim balalar, kóp balaly otbasynan shyqqandar men múgedekterge arnaıy jeńildikter qarastyrylyp otyr. Aýyldan kelgen stýdentterge úsh mezgil tamaqpen qamtamasyz etilgen jataqhana beriledi.
Sharafat Jylqybaeva
