Qazaqstan Respýblıkasy Prezıdenti Qasym-Jomart Toqaevtyń Jambyl oblysyna jasaǵan saparynda Almaty, Shymkent qalalary men Almaty, Jambyl,Túrkistan oblystarynda ótetin «Jańa Jibek joly» ekspedısıalyq baǵytyn týrısik áleýetin arttyrýda paıdalaný, bul baǵytta ınfraqurylymdardy jetildirýde ınvestısıa tartý sekildi júıeli jumystardy uıymdastyrýdy tapsyrǵan bolatyn. Prezıdent pármen bergen tapsyrmany oryndaý maqsatynda oblys ákimdigi týrızm basqarmasynyń «Jańa Jibek joly» týrısik jobasyn jasap, respýblıkanyń ońtústik óńirlerin qamtyǵan ekskýrsıa uıymdastyrýda, dep jazady Qamshy.kz aqparat agenttigi. 

Atalǵan ekskýrsıa aıasyna sala mamandary jańa týrısik baǵyttardy túzý úshin óńirlerdegi kıeli jerlerdi, tarıhı, mádenı oryndardy aralap, olarda zertteý jumystaryn júrgizedi. Sondaı-aq ishki týrızmdi damytýdyń alǵysharty sanalatyn bul shara aıasynda oblystardyń aýmaǵyndaǵy, shekaralarynda turǵan týrısik nysandar fotosýretterge men vıdeorolıkterge túsirilmek. Olardyń qazirgi hal-ahýaly jaıyndaǵy aqparattar da jınaqtalatyn bolady. Týrızm basqarmasy qolǵa alǵan jobanyń aýmaǵy halyqaralyq sıpat alatyn syńaıly.

–«Jańa Jibek joly» týrısik baǵyty Qytaıdyń Sınszán-Uıǵyr avtonomıalyq aýdanynan bastalyp, elimizdegi Almaty, Jambyl, Túrkistan oblystary men Almaty, Shymkent qalalaryn qamtıdy. Sonymen birge jańa halyqaralyq týrısik baǵytqa Ózbekstan Respýblıkasynyń aýmaǵyndaǵy tarıhı-mádenı oryndar engiziledi,–deıdi oblys ákimdigi týrızm basqarmasynyń basshysy Qarlyǵash Aralbekova.

Jańa týrısik baǵytqa enetin nysandardy ınfraqurylymdyq turǵydan jetildirý isin oblystyq týrızm basqarmsy kórshiles oblystar men Shymkent, Almaty qalalaryndaǵy áriptesterimen birlese talqylady. Bul máseleler óńiraralyq jumys toby otyrysynyń kún tártibine qoıyldy. Atalǵan jumys tobynyń otyrysyna oblystar men qalalardan kelgen ókilderi óz aımaqtarynda jańa týrısik baǵytqa engen nysandardyń tarıhı mańyzy, onyń búgingi jaǵdaıy týrasynda málimetterimen bólisti. 3 kúnge sozylǵan jıyn qonaqtary jańa týrısik baǵytqa Jambyl oblysynan engen nysandardyń da jaı-kúıimen tanysý maqsatynda Taraz qalasy, T.Rysqulov, Merki, Shý,Qordaı aýdandarynda boldy. Bul issaparlarda ishki týrızmdi damytý máselesine qatysty usynystar men ózekti máselelerdi sheshý jaıy talqylandy.