Jańatas temir jol stansıasy oblystaǵy júk tasymaldaý isindegi kóshbasshy stansıa sanalady. Ári ol osy óńirdegi ken óndirý isindegi alpaýyt kásiporyndarynyń ónimderin tasymaldaý mısıasyn minsiz oryndap keledi. Munda qazir táýligine túrli baǵyttar boıynsha 128 vagon fosfor rýdasy men fosfor uny ishki, syrtqy naryqqa jol tartýda, dep jazady Qamshy.kz aqparat agenttigi. 

Negizinen aǵymdaǵy jyly irgetasy qalanǵany 50 jyl tolǵan Jańatas qalasyndaǵy temir jol stansıasynyń tarıhy ári de jatyr. Bul mańda kenniń mol qory barlanǵan sátten ony ıgerý isine bilikti sybanyp kirisken Keńes Odaǵy bul jumysty ólkege temir jol jelisin tartýdan bastady. Osylaısha 1963 jyly qazirgi Jańatas qalasyna temir jol jetkizildi. Bul óndiristiń qalanyń qurylysyn júrgizý, ondaǵy kendi ıegerý, tasymal isine tyńnan túren saldy.

Búginde stansıa áleýetti tapsyrys berýshileri qoıǵan talaptyń údesinen shyǵýda materıaldy-tehnıkalyq bazasyn nyǵaıtýǵa ıek artqan. Ári olardyń «QazFosfat», «EýroHım Qarataý» jaýapkershiligi shekteýli seriktestikterimen áriptestik ornatýy Jańatas temir jol stansıasynyń halyqaralyq júk tasymaly salasyndaǵy áleýetin tanyta bastady.

–Jalpy Jańatas temir jol stansıasy 2 klasty stansıa sanalady. Bul stansıasy temir joldaǵy júk tasylmaldaý isinde oblys boıynsha kósh basynda keledi. Táýligine jańatastyq temirjolshylar 128 vagon fosfor rýda men fosfor unyn tıep, tıisti baǵyttarǵa jóneltedi. Fosfor rýdasy temir jolmen Asa stansıasyna, al fosfor uny Shaıqoryq stansıasyna deıin jetkizedi. Odan bólek osyndaǵy Sozaq stansıasynan táýligine 50 vagonǵa hımıalyq qyshqyldar men tabıǵı ýran júkteledi. Bul ónimder osy jerden Reseı men Qytaıǵa qaraı jol tartady. Sońǵy jyldary bizdegi júk tasymaldaý kólemi 3 esege artty. Sáıkesinshe stansıanyń klass deńgeıin 1 klasqa aýystyrýǵa nıet etip otyrmyz. Sol arqyly temirjolshylardyń jalaqysyn kóbeıtý, shtat sanyn ulǵaıtýǵa qol jetkizemiz. Búginde stansıada 123 adam jumys jasaıdy,–deıdi stansıa bastyǵy Nurbek Asqanbaıuly.

Qazir stansıa arqyly «EýroHım Qarataý» kompanıasy óz ónimderin Soltústik Kavkaz temir jol jelisindegi Belorechensk stansısy men Ózbekstan temir jol jelisindegi Ozodlık stansıasyna jóneltýde. Óńirdegi hımıa ónerkásibiniń alpaýyttarynan bólek stansıasy «Jaras» munaı bazasy, munaı óńdeý zaýyty, «Aıanat» munaı ónimderi, «Asyl tuz» sekildi kompanıalardyń da ónimderin tasymaldaý boıynsha tapsyrystaryn talapqa saı oryndaıdy.