Memleket basshysy Q.Toqaevtyń Qazaqstan halqyna alǵashqy Joldaýynda mán bergen mańyzdy máselelerdiń qatarynda ınfraqurylymdy damytý jaıy da bar. Osy oraıda Prezıdent «Aldaǵy úsh jyl ishinde turǵyndardy taza aýyz sýmen jáne sý jetkizýmen qamtamasyz etýge shamamen 250 mıllıard teńge bólinedi.
Atqarýshy bılik organdary «Nurly jol» baǵdarlamasyn tolyq jáne sapaly iske asyrýǵa basa mán berýi kerek.
Bul – strategıalyq joba. Sonyń arqasynda búkil kólik ınfraqurylymy jańǵyrtylady.
Osy maqsatqa oraı, memleket 2022 jylǵa deıin 1,2 trıllıon teńgeden astam ınvestısıa salady.
Úkimet buǵan deıin de kóp qarajat bólgen bolatyn, biraq onyń kóbi qumǵa sińgen sýdaı joq bolyp ketti. Ashyǵyn aıtsaq, sheneýnikterdiń qaltasyna ketti, al taza sý, jol jáne basqa da ınfraqurylymnyń jaǵdaıy áli de sol kúıinde.
Bul joly Úkimet pen Parlament Esep komıtetimen birlesip, búdjet qarajatyn tolyǵymen tıimdi paıdalanýdy qamtamasyz etýi tıis» dep atap ótti.
Búginde Jýaly aýdanynda eldi mekenderdi aýyzsýmen, gazben qamtý, avtomobıl joldaryn jańǵyrtý jumystary jandana túsýde.
-Prezıdent turǵyndardyń taza aýyz sýǵa, tabıǵı gazǵa, kólik ınfraqurylymyna birkelki qol jetkizýdi tapsyrdy. Aýdanda 49 eldi mekenniń 15-i nemese 31 paıyzy gazdandyrylǵan. 2027 jylǵa deıin taǵy da 19 eldi mekendi gazdandyrý josparlanýda.
Eldi mekenderdiń 31 paıyzy nemese 5 aýyl ortalyqtandyrylǵan aýyz sýmen, 10 aýyl ortalyqtandyrylmaǵan sýmen qamtylǵan. 2023 jyly aýdan turǵyndaryn 85,7 paıyz taza aýyz sýmen qamtý josparlanyp otyr. Sebebi jeti eldi mekende úı sany 50-den kem bolýyna baılanysty aýyz sýmen qamtamasyz etý tıimsiz,-deıdi Jýaly aýdanynyń ákimi Narbaı Ergebekov.
Jalpy, Jýaly óńirinde «Nurly jol» baǵdarlamasy aıasynda 2019 jyly eki joba iske asyrylýda. Bul maqsatqa 306,4 mıllıon teńge (respýblıkalyq búdjetten 125,7 mıllıon teńge, oblystyq búdjetten 180,7 mıllıon teńge) bólingen. Bólingen qarajat boıynsha 15,4 shaqyrym jańa jol jóndeýden ótti.
Joldaýda halyqtyń ál-aýqatyn kóterý, turmysyn jaqsartý, jumyspen qamtý, ınfraqurylymdardy damytý jóninde júktelgen mindetterdi oryndaý baǵytynda aýdanda maqsatty jumystar jalǵasyn taba beretin bolady.
