Nýmerologıa – ejelden kele jatqan ǵylymnyń biri. Týǵan kún, aı, jylyńyzdaǵy sandardy bir-birine qosý arqyly jeke tulǵanyń ózine ǵana tán minez, maqsatqa umtylys, kúsh-jiger syndy qabiletterin anyqtaýǵa bolady.

Nýmerologtar sandar arqyly adamnyń bolashaǵyn aıtyp, mysaly, 40 ne, 50 jasta adamnyń ózi bilmeıtin qupıalaryn sıpattaýǵa bolady degen ustanymda.

Qyzyldy-jasyldy álemde jastardyń kóbi derlik nýmerologıaǵa ımandaı senip, meniń baqyt ákeler sanym osy, sáttilik ákeletin túsim mynaý, qarjy kodym myna san dep shyrmalańǵa ilikti. Baqyttyń bastaýyn nýmerologıa sanap júrgen jandardyń qarasy kún sanap artýda.

Nýmerologıa týraly sharıǵat ne deıdi?

Dintanýshy Abdýsamat Qasym:  "Nýmerologıa – tylsym álemmen baılanysy bar ezoterıalyq (qupıa) nanym júıesi. Muny "sandarmen bal ashý" dep ataıdy. Sharıǵatta pal ashý da, ashtyrýda haram. Árbir árip pen sandarda belgili bir málimetter jasyrylǵan degen senimniń ǵylymı negizi joq. Ol qur qıal men soqyr senimdilik ǵana. Qazirgi nýmerologıa – "soqyr senimdilik pen jalǵan ǵylym "ljenaýka".

İlim sharıǵatqa saı emes degen negiz bar. Ardaqty Paıǵambarymyz (s.ǵ.s) óziniń duǵasynda "Ilmán nafıǵan" ıaǵnı "Paıdaly ilim bere gór" dep tileıtin. Osylardy eskersek, musylman kisi "nýmerologıa" sekildi adamnyń dúnıe-aqyretine esh paıdasy joq nárselerge ýaqytyn sarp etýden boıyn aýlyq ustaǵan jón" – dep baǵa berdi.

Al nýmerolog-psıholog Aıgúl Túzelbaıqyzy: "Nýmerologıany bal ashýdyń bir túri dep jatady. Bul – qate uǵym. Nýmerologıa – ǵylym. Maǵan keńes alýǵa kelgen adamda 7, 8 sandar múldem joq bolsa, siz Allaǵa múldem senbeıdi ekensiz, sizdiń qateligińiz osy jerde dep aıtamyn. Kersinshe, sizge Qudaıǵa, óz taǵdyryńyzǵa sený kerek dep deımin. Óıtkeni, bizdi de solaı oqytqan. Nýmerologıada ateıs bolmaý kerektigi aıtylady. Demek, nýmerologıa dindi qoldaıdy. Adamdarmen jumys kezinde de osy qaǵıdany men ustanamyn.

Bul ǵylym adamǵa adaspas úshin baǵyt-baǵdar ǵana beredi. Minez-qulqyna sıpattama jasaýǵa kómek berip, alda kezdesetin qaýip-qaterden saqtanýǵa septigin tıgizedi" – deıdi.

Mamannyń pikirine ustaz Qýat Qabdolla qarsy ekenin aıtty.

Onyń aıtýynsha, nýmerologıa sharıǵatta tyıym salynǵan. Bolashaqty Alla ǵana biledi.

Sondaı-aq fılolog Amansha Nıazova: "Taǵdyrdy boljaý máselesine óz basym qarsymyn. Dinı turǵyda da bul nárse quptalynbaıtyn ǵylym. Adamǵa aqyl, keńes, baǵyt-baǵdar berýge bolady. Biraq, taǵdyryn boljap emes" – dep pikirin bildirdi.

Alla Taǵala Qurannyń áz-Zarıat súresi, 55-aıatynda: "Eskert! Óıtkeni, eskertý múminderge paıda beredi" – degen.  Endeshe, aq pen qarany ajyratýdy oqyrmannyń enshisine qaldyrýdy jón sanadyq.