Ótken jyly qolǵa alynǵan «Serpin-2050» pılottyq jobasy bıyl alǵashqy ret jumysyn bastady. Myńdaǵan jastardyń baǵyn jandyryp, bilim tuńǵıyǵyna jetelegen áleýmettik jobaǵa 6200 grant bólindi. Bul týraly Mańǵystaý oblysyna arnaıy at sabyltyp kelgen «Máńgilik el jastary – ındýstrıaǵa!» - «Serpin-2050» jobasy respýblıkalyq úılestirý keńesiniń tóraǵasy Murat Ábenov málimdedi.

– «Serpin-2050» jobasy eki maqsatty kózdeıdi. Elimizde ınno­vasıalyq-ındýstrıalyq ma­ńyz­dy jobalar júzege asyrylyp, óńirlerge qajetti óndirister, zaýyttar iske qosylýda. Alaıda onyń nátıjeli bolýy tikeleı tehnologıalar men mamandarǵa baılanysty ekeni aıan,-dep bastady sózin BAQ ókilderine arnalǵan baspasóz májilisinde Murat Ábenov. – Ókinishke oraı, birqatar óndiristik aımaqtarymyzda bala týý kórsetkishi tómen, halyq sany shamaly. Bul kadr resýrstaryna keri áserin tıgizip, óndiristi quldyratady. Oǵan kerisinshe, bala týýdan kósh bastaǵan 5 oblysymyz bar. Ekonomıkalyq maqsat – osy 5 oblystyń jastaryn óndiristik óńirlerge jiberip, sol jerde qajetti mamandyqtarǵa oqytyp, bilikti kadrlardy daıarlap shyǵarý.  Al ekinshi áleýmettik maqsatyna keler bolsaq, halyq sany joǵary Mańǵystaý, Almaty, Qyzylorda, Jambyl jáne Ońtústik Qazaqstan oblystarynyń ózekti máselesi – balabaqsha, mektep, kolej jáne joǵary oqý oryndaryndaǵy oryn tapshylyǵy ekeni belgili. Mektep uıasynan qanat qaqqan túlekter birdeı mamandyq tańdap, keıin shekteýli bos jumys oryndaryna talasyp, aqyrynda joly bolmaǵandar jumyssyzdardyń qataryn toltyrady. Bul keleńsizdikti boldyrmaý úshin bes aımaqtyń balalaryn eńbek naryǵynda suranysqa ıe mamandyqtarǵa tartyp, halyq sany tómen aımaqtarǵa nápaqasyn tabýǵa jiberý qajet,-dedi ol.

Ataýy aıtyp turǵandaı, memleketimizdiń ekonomıkalyq jáne áleýmettik salasyna serpin berer bul jobanyń ereksheligi – grant ıelengen jastardy tolyq jataqhanamen qamtamasyz etip, shákirtaqysyn berip, poıyz jolyn tóleıdi. Sondaı-aq joba úılestirýshisi M.Ábenovtyń sózinshe, balalar bilim alýmen qatar, óndiristik oryndarda jumystarǵa aralasyp, tájirıbe jınaıdy. «Ýnıversıtet támamdaǵan túlekter 100 paıyz jumyspen qamtylady. Keıbir jastar aýyldaryna oralǵysy ne oqýdy jalǵastyrǵysy keledi. Oǵan da shekteý qoıylmaıdy. Memleket barlyq jaǵdaıdy jasap, tańdaý usynady. Kelesi qadam jastardyń óz erkinde»,- dep sheshile sóıledi ol.

Ótken jyly bastalsa da, úlken qyzyǵýshylyq týdyrǵan «Serpin-2050» jobasy aıasynda bıyl joǵary oqý oryndaryna – 5000, kolejderine – 1200 grant bólindi. 8 aımaqtyń 19 ýnıversıteti men 36 koleji qatysyp, 60 mamandyqty usyndy. Murat Abdýlamıtuly talapkerlerdi  «Serpin-2050» jobasyna qatysýǵa, grant ıegeri atanýǵa shaqyryp, qujattardy tapsyrý talaptarymen Serpin-2050.kz saıtynan tanysýǵa bolatynyn aıtty. 

Bilimge qumar jastardyń bolashaǵy jarqyn bolýyna járdemdesetin «Serpin-2050» áleýmettik jobasy boıynsha stýdentterdi jiberýshi jáne qabyldaýshy oblystarda aımaqtyq shtabtar qurylyp, jumys isteýde. Talapkerler tolǵandyrǵan saýaldary boıynsha osy shtabtarmen habarlasyp, tolyq aqparatqa qanyǵa alady.

Aqparat kózi: Mangmedia.kz.