Jýyrda oblys ákimdiginiń konferens-zalynda  medısınalyq jáne farmasevtıkalyq qyzmetti baqylaý komıtetiniń oblystyq departament basshysy  Eldesh  Qosmaǵanbetovtyń qatysýymen «Pasıentterdi qoldaý jáne ishki aýdıt qyzmeti» taqyrybynda baspasóz-konferensıasy ótti. Basqosý barysynda medısınalyq kómek kórsetý sapasyn arttyrý,  medısınalyq uıymdardy bilikti jáne jaýapty medısınalyq qyzmetkerlermen jasaqtaý, senim telefondarynyń tıimdi qyzmetin qalyptastyrý,  naýqas shaǵymdaryna shuǵyl nazar aýdarý máseleleri talqylandy.

«Sapaly medısınalyq qyzmet – naýqas densaýlyǵyn úz­diksiz qadaǵalaý,  ózara tulǵaaralyq baılanys ornatý men dıagnostıka jáne sapaly emdeý ádisteriniń ná­tıjeliligi. Emdeý ádisteriniń densaýlyq úshin tıimdiligi men qa­ýipsizdigi medısınalyq qyzmetkerlerine degen zor senimdi qa­lyp­tastyrady. Sol sebepti sapaly medısınalyq qyzmet qol­je­timdiligin arttyrý – basty nazarda», - deıdi E.Qosmaǵanbetov. 

Qazaqstan Respýblıkasy Densaýlyq saqtaý jáne áleýmettik damý mınıstrimen 2015 jylǵy 27 aqpanda bekitilgen medısınalyq qyzmetter sapasyna ishki jáne syrtqy saraptama júrgizý men uıymdastyrý boıynsha  Jol kartasynyń  1.4-tarmaǵyn iske asyrý maqsatynda pasıentterge qoldaý kórsetý jáne ishki baqylaý qyzmeti uıymdastyryldy. Naýqastardyń quqyqtaryn qorǵaý boıynsha túıtkildi másele túıinin tarqatý boıynsha óńirdegi kez kelgen me­dısınalyq uıymdarda «Naýqastardy qoldaý jáne ishki baqylaý qyzmeti»  óz mindetin atqarýy tıis. Baqylaý qyzmetiniń basty  maqsaty – medısınalyq qyzmet sapasyna saraptama jasaý, biryńǵaı standarttardy engizý, medısına mekemeleriniń materıaldyq-teh­nıkalyq bazasyn nyǵaıtý, jańa tıpti ınovasıalyq qural-jabdyqtarmen qamtý.  

«Oblystyń kez kelgen turǵyny usynylǵan medısınalyq qyzmet sapasyna kóńili tolmasa, qyzmetkerler tarapynan dóreki qarym-qatynasqa ushyrasa, tegin medısınalyq kómektiń kepildik berilgen kólemi sheńberinde  kórsetiletin medısınalyq qyzmetter úshin medısına personalynyń aqsha talap etý faktileri bolǵan jaǵdaıda jáne ózge de saýaldar boıynsha  www.mediafarm-aktau.kz  departamenttiń ǵalamtordaǵy resmı saıtynda ornalasqan «Senim telefonyna» habarlasa alady», - deıdi departament basshysy.

«Ult jospary – N.Nazarbaevtyń  bes ınstıtýsıonaldyq reformasyn júzege asyrýdyń 100 qadamy»  strategıalyq qujattyń 82 – qa­damynda  Densaýlyq saqtaý  jáne áleýmettik damý mınıstrligi janynan medısınalyq qyzmet sapasy boıynsha birlesken komısıa qurý mindetteldi. Osy baǵytta «Qoǵamdyq densaýlyq saqtaý joǵary mektebinde» Mańǵystaý óńirinen 30 bilikti maman  medısınalyq qyzmet sapasyn jaqsartý jáne saraptaý boıynsha oqý kýrsynan ótti.

Eskere keter jaıt,  «Halyqtyń densaýlyǵy  jáne densaýlyq saqtaý júıesi» QR Kodeksiniń 14-babyna sáıkes, kórsetiletin medısınalyq qyzmetterdiń densaýlyq saqtaý salasyndaǵy belgilengen talaptar men standarttarǵa sáıkestigin taný maqsatynda, sondaı-aq densaýlyq saqtaý salasyndaǵy mamandardyń kásiptik daıarlyǵyna baǵalaýdy júrgizý jáne biliktiliginiń sáıkestigin rastaý úshin densaýlyq saqtaý sýbektileri densaýlyq saqtaý salasynda akkredıttelýge jatady. Akredıtteý maqsaty – medısınalyq uıymdardyń básekege qabilettiligin, medısınalyq qyzmet sapasyn arttyrý, qoǵamda oń ımıj qalyptastyrý.

«2014 jyly Mańǵystaý oblysynan – 2, Batys Qazaqstan oblysy jáne Aqtóbe oblysynan – 8, al Atyraýdan – 4  medısınalyq uıym  óz erkimen akredıtteýden ótti. Bıyl óńirden 3 uıym respýblıkalyq akredıtteýden ótýge ótinish bildirdi. Kórsetkish kóńil kónshitpeıdi»,-deıdi E.Qosmaǵanbetov.

Aqparat kózi: Mangmedia.kz.