Aǵymdaǵy jyly «Aqtaý teńiz porty» arnaıy ekonomıkalyq aımaǵynda 6 kásiporyn iske qosylady. Osylaısha elimizde munaı óndirisine qajetti erekshe qubyrlar, polımer ónimderi men suıyq dáriler shyǵarylatyn bolady. 

Sonymen qatar Aqtaýda alǵash ret azyq-túlik saqtaıtyn iri logıstıkalyq ortalyq qoldanysqa beriledi, dep habarlaıdy 24.kz.

Jańa jobalardyń arqasynda 500 mańǵystaýlyqqa jańa jumys orny ashylady. «Aqtaý polımer» zaýytynda jumys qyz-qyz qaınaýda. Qazir óńirdegi tozyǵy jetken sý, gaz, káriz jáne jylý qubyrlarynyń ornyna osynda óndirilgen qubyrlar tóselip jatyr. Kásiporynda jylyna 67 myń metr polıetılen qubyry shyǵarylady. Óndiriske qajetti shıkizat Parsy shyǵanaǵy elderinen «Aqtaý teńiz porty» arqyly jetkiziledi. Polımer zaýyty bıyldan bastap óńirde alǵash ret jylýdy barynsha saqtap turatyn oqshaýlanǵan qubyrlardy jasap shyǵara bastady. Muny jumysshylar «aqyldy qubyr» dep ataıdy.  «Temir qubyrdyń syrtyn polıetılen qaptamamen qaptap, ishin kóbikpen toltyramyz. Ol polıetan dep atalady. Munyń ereksheligi, jylýdy tutynýshyǵa deıin mol kólemde jetkizýinde jáne shyǵyny az. Jańa tehnologıamen jasalýda. İshinde mystan sym júrgizilgen. Bul arnaıy apparatqa jalǵanady da, qubyr jarylyp, sý ketken jaǵdaıda sol aralyqty 1 metrge deıingi aýytqý dáldigimen kórsete alady»,-deıdi aǵa sheber Shattyq Qulybekov.

Qazir arnaıy ekonomıkalyq aımaqta 9 kásiporyn jumys istep tur. Munda teńizdegi munaı ıgerý jumystaryna arnalǵan metalqurastyrmalarynan bastap, turǵyn úı men jol salýǵa qajetti túrli ónim óndirilip jatyr. 12 jyl buryn qurylǵan aımaqqa osy kúnge deıin 30 mlrd teńge ınvestısıa quıylyp, 223 mlrd teńgeniń ónimi óndirilgen. Osylaısha «Aqtaý teńiz porty» arnaıy ekonomıkalyq aımaǵy damý kórsetkishi jaǵynan elimiz boıynsha «Astana - jańa qala» ekonomıkalyq aımaǵynan keıingi ekinshi orynǵa kóterildi. Munda elimizdiń jáne sheteldiń kásipkerleri úshin memleket tarapynan túrli jeńildikter qarastyrylǵan. Osynyń arqasynda jańa ınovasıalyq jobalardy júzege asyrýǵa nıettiler sany artyp otyr. «Aqtaý teńiz porty» arnaıy ekonomıkalyq aımaǵynyń basqarma basshysy Ámirbek Tólegenovtyń aıtýynsha, bul aımaq óńir ekonomıkasynyń ǵana emes, áleýmettik jaǵdaıynyń jaqsarýyna da jol ashyp otyr. Qazir munda myńnan astam adam eńbek etip jatyr. Bıyl taǵy 400 adamǵa jańa jumys oryndary ashylady. Alty ınvestor «Arnaıy ekonomıkalyq aımaq» aýmaǵynda jańa jobalardy júzege asyrýǵa kirisip ketti.

Aqparat kózi: İnform.kz.