Almaty. Qamshy portaly - 11 shilde kúni Aqtaý qalasynda «Bala Turkvizyon Qazaqstan» baıqaýynyń aımaqtyq irikteý kezeńi ótti, dep jazady baistars.kz. 

Mańǵystaý oblysynyń túkpir-túkpirinen 8-13 jas aralyǵyndaǵy 100-den astam ul men qyz óz ónerin kórsetip, jeńiske jetem degen qulshynyspen M. Óskinbaev atyndaǵy oblastyq fılarmonıaǵa jınaldy. Mańǵystaý óńirinde ótken irikteý ereksheligimen este qaldy. Baıqaý alańyna qatysýshylardan bólek, ónerpazdarǵa qoldaý kórsetýge birneshe mýzykalyq ujymdar keldi. Ár óńirde juldyzdy tálimgerler - Qazaqstan estradasynyń jas ánshileri óz komanda múshelerimen birge 8-13 jas aralyǵyndaǵy jas ónerpazdardy tańdap, jartylaı fınal qatysýshylaryn anyqtady. Mańǵystaý oblysynan jeńimpazdy anyqtaýǵa Kámshat Joldybaeva, QR Eńbek sińirgen ártisi Maıra İlıasova jáne «Keshú» tobynyń múshesi Juldyz keldi.

Fort-SHevchenko qalasynyń turǵyny Arýjan Saǵynǵalıeva «Bala Turkvizyon Qazaqstan» baıqaýynyń Mańǵystaý oblysy boıynsha jeńimpazy atandy. Arýjan 11 jasta. Úıde bes balanyń tórtinshisi. Vokalmen aınalysqanyna 3 jyl boldy. Sońǵy bir jyl boıy ustazy Aıda Baıgelovadan M.Óskinbaev atyndaǵy fılarmonıada kásibı vokaldan sabaq alýda. QR Eńbek sińirgen ártisi Maıra İlıasova atap ótken, erekshe án salý qabiletinen bólek, Arýjan sýret salǵandy jaqsy kóredi. Baıqaýǵa deıin, úmittenip bolashaq tálimgeri Kámshat Joldybaevanyń portretin salǵan eken. Sol armany oryndalyp, Kámshat endi Arýjandy baıqaýdyń Astanada ótetin jartylaı fınalyna daıyndaıtyn bolady.

«Bala Turkvizyon» Halyqaralyq balalar áni baıqaýynyń Atyraý oblysyndaǵy Ulttyq irikteýi 15 shilde kúni, Qurmanǵazy atyndaǵy mádenıet saraıynda ótedi. Kelesi jeńimpazdyń esimi sol kezde belgili bolady.