Mańǵystaý oblysy 2020 jylǵa deıin tolyqtaı sýmen qamtylady. 

Almaty. Qamshy portaly - Bul týraly Mańǵystaý oblysynyń ákimi Alık Aıdarbaev málim etken.

«Sý oblysta tapshy. Biz qazir 100 myń tekshe metr sýdy tushytyp kelemiz. Sý qubyr arqyly Edil ózeninen tasymaldanady. Mysaly, 100 myń tekshe metr biz óndiremiz, 40 myń tekshe metr sý áli jetispeıdi. Keıbir eldi mekenderge sý kestemen berilýiniń sebebi osynda jatyr. Eger eshteńe qolǵa almasaq, sý tapshylyǵy 70 myń tekshe metrge deıin ósedi», - dep atap ótti óńir basshysy. 

Onyń aıtýynsha, oblysta osyǵan baılanysty «Kaspıı» sý tushytý zaýyty salynǵan.  Onyń qýattylyǵy 40 myń tekshe metr sý tazartýǵa jetedi. 

«Bolashaqta 70 myń tekshe metr sý qajettiliktiń 40 myńyn biz osylaısha jappaqpyz. Sonymen qatar oblys ákimdigi «Astrahan-Mańǵyshlaq» sý tasymalynyń ıesi «QazTransOıl» kompanıasymen kelisim jasady. Olar tehnologıalardy jańǵyrtý arqyly onyń qýatyn 15-20 myń tekshe metrge ulǵaıtady. Aqtaýdaǵy bizdiń sý tazartý kompanıasy da óz qýatyn arttyratyn bolady, osylaısha biz 2020 jylǵa deıin sý tapshylyǵyn joıamyz. Sonymen qatar ortalyqtandyrylǵan sý júıesimen qalalardyń 100 paıyzy, aýyldardyń 80 paıyzy qamtylady», - dedi ákim. 

Onyń aıtýyna qaraǵanda, oblys ákimdigi oǵan qajetti jobalardyń tizimi men qajetti qarajat kólemin anyqtady. 

«Jobalardy iske asyrý úshin jylyna bizge 10 mlrd. teńge qajet. Oǵan qosa, qazirden bastap, kezeń-kezeńimen jobalyq-smetalyq qujattamasyn jasaýdamyz. Bıyl 4 mlrd. teńge jumsaldy. Kelesi jyly 5-6 mlrd. teńge ketedi dep josparlanýda. Jalpy «Aq bulaq» baǵdarlamasy aıasynda 60 mlrd. teńge bólinedi. Sondyqtan 2020 jylǵa deıin bul másele sheshimin tabady», - dep túıdi sózin A. Aıdarbaev.