Kaspıı óńiri munaıgaz salasynda servıstik qyzmet kórsetý boıynsha birinshi orynǵa shyǵýdyń barlyq basymdyqtaryna ıe. Búgin  Mańǵystaý oblysynyń ákimi Alık Aıdarbaev osylaı málim etti.

Ákimniń aıtýyna qaraǵanda, Mańǵystaý oblysynda óńirdi damytýdyń bes strategıalyq baǵyty aıqyndaldy. Bular:  dástúrli sala munaı-gaz óndirý, munaıservız klasterin qurý, kólik jáne logıstıka, týrızm jáne qurylys.

«Munaı jáne gaz óndirý salasynda biz jumys istep turǵan ken oryndarynyń tıimdiligin arttyryp jatyrmyz. Bıyl oblys alǵash ret sońǵy birneshe jylda munaı óndirisin arttyrýǵa qol jetkizdi. 9 aıda munaı ónimi 13,8 mln. tonnany qurap, 2,7 paıyzǵa jospar oryndalǵan. Bul rette munaı óndirý negizinen eski ken oryndarynan, atap aıtqanda, Jetibaı, Qalamqas, Qarajanbas sekildi kenderden alyndy. Sonymen qatar, munaı óniminiń ósimi jańa tehnologıalar engizý esebinen oryn aldy», - deıdi Alık Aıdarbaev.  

Budan bólek, oblys ákimi óńirlik ekonomıkany damytý aıasynda jańa ken oryndaryna geologıalyq barlaý jáne eski kenderge barlaý jumystaryn barlaý belsendi túrde júrgiziletinin atap ótti. Bul rette teńiz ken oryndarynyń perspektıvasy joǵary.

«Ulttyq munaı klasteri aıasynda jańa munaıservız klasteri qurylady. Bul joba Mańǵystaý, Atyraý jáne Batys Qazaqstan oblystarynda júzege aspaq.  Tutastaı alǵanda Kaspıı óńiri munaı-gaz salasynda servıstik qyzmet kórsetý boıynsha birinshi orynǵa shyǵýdyń barlyq basymdyqtaryna ıe. Biz Kaspıı teńizinde ońtaıly geografıalyq aýmaqta ornalasqanbyz, muzqatpaıtyn Aqtaý jáne Qoryq teńiz porty bar, mashına qurylysynyń qýaty zor, daıyn ınfraqurylym men jańa temirjol jáne avtokólik qatynastary ashylmaq. Transport pen logıstıka turǵysynan alsaq, Mańǵystaý basqa óńirlerge de jaqyn bola bastady jáne óńirlik kóliktik torapqa aınalýda», - dedi A. Aıdarbaev.