Almaty. Qamshy portaly – Búgin  Ońtústik Qazaqstan oblysy ákimdigindegi QR Bilim jáne ǵylym mınıstrligi Bilim jáne ǵylym salasyndaǵy baqylaý komıtetiniń tóraǵasy Saıat Núsýpovtyń qatysýymen 2015-2016 oqý jylyna mektep oqýshylaryn oqýlyqtar men oqý-ádistemelik keshendermen qamtý máselelerine arnalǵan májilis ótti. Aýdan, qala ákimderiniń orynbasarlary men bilim bólimderiniń meńgerýshileri, «Atamura», «Mektep», «Almatykitap», «Arman PV» syndy baspalardyń ókilderi shaqyrylǵan jıyndy oblys ákiminiń orynbasary Erlan Aıtahanov júrgizdi. Atalǵan jıynda habarlama jasaǵan oblystyq bilim, jastar saıasaty jáne tilderdi damytý basqarmasynyń basshysy Albına Elshıeva ońtústikte oqýshylar sanynyń jyl saıyn artyp kele jatqanyn toqtalyp, oqýlyqtar men oqý-ádistemelik keshenderdi satyp alýǵa jergilikti búdjetten 1 mlrd. 326 mln. teńge bólingenin aıtty. Qosymsha 1 mlrd. 410 mln. teńgeniń qajettiligi anyqtalyp, onyń 925 mln. oblystyq qazynadan bólinse, qalǵan 484 mln. 898 myń teńgesi aýdan, qalalardyń búdjeti esebinen sheshiledi dedi. Sondaı-aq, oqýlyqtar ázirleıtin 12 baspamen 104 kelisimsharttyń túzilgenin jetkizip, daıyn ónimdi tasymaldaýda kezdesetin máselelerge nazar aýdardy. Jıyndy qorytyndylaǵan oblys ákiminiń orynbasary E.Aıtahanov oqýlyqtar máselesiniń 20 tamyzǵa deıin sheshilip, barlyq bilim mekemelerine tasymaldap berý jóninde jaýaptylarǵa naqty mindetter júktedi. Májilisten keıin aýdandar men qalalardaǵy bilim bólimderi oqýlyq daıyndaıtyn baspalarmen ekijaqty kelisimshartqa otyrdy.

Derekkózi: OQO ákiminiń baspasóz qyzmeti