Almaty. Qamshy portaly – Elimizdiń barlyq óńirlerinde 1 tamyzdan bastap «Mektepke jol» aksıasy bastalady. Búgin «Ońtústik» aqparat ortalyǵynda Elbasynyń tapsyrmasymen mektep oqýshylarynyń tolyq mektepke barýyn qamtamasyz etý maqsatynda uıymdastyrylyp jatqan qaıyrymdylyq aksıasy jaıynda oblystyq bilim, jastar saıasaty jáne tilderdi damytý basqarmasynyń bólim basshysy Ǵ.Júsipova men OQO İİD ákimshilik polısıa basqarmasynyń bólim bastyǵy Ǵ.Jetibaev málimdeme jasady. Ońtústik Qazaqstanda eki aıǵa jalǵasatyn qaıyrymdylyq aksıasy «Balalarǵa birge kómek bereıik!» uranymen ótedi dedi, ‒ Ǵ.Júsipova. Jyl saıyn dástúrli túrde uıymdastyrylatyn shara osymen 8-i ret qolǵa alynyp otyr. Sharany óz deńgeıinde uıymdastyryp ótkizý úshin is-sharalar jospary ázirlenip, oblystyq uıymdastyrý komıteti quryldy. Atalǵan uıymdastyrý komıtetiniń quramyna OQO bilim jastar saıasaty jáne tilderdi damytý, oblystyq ishki saıasat jáne din isteri, oblystyq jumyspen qamtýdy úılestirý jáne áleýmettik baǵdarlamalary jónindegi basqarmalar men OQO İİD, oblystyq ata-analar komıteti jáne aýdan, qala ákimderiniń orynbasarlary engizildi. Aksıa aıasynda mektep tabaldyryǵyn alǵash ret attaǵaly otyrǵan balalarǵa estelik syılyqtar taratyp, áleýmettik qorǵalmaǵan otbasylardyń birinshi synypqa baratyn balalaryna qaıyrymdylyq is-shara, az qamtylǵan otbasylarǵa kómek kórsetý úshin iri saýda úılerinde mektepke qajetti zattar men oqý quraldaryn qabyldaýǵa arnalǵan konteınerler ornatý arqyly «Balalarǵa birge kómek bereıik!», «Aýyl balalaryna – mektepke syılyqtar», «Otbasy otbasyǵa kómek kórsetedi: Balalardy mektepke daıyndaımyz!» «Meıirimdi qoldar» atty sharalar uıymdastyrylady. Sondaı-aq, OQO İİD ákimshilik polısıa basqarmasynyń bólim bastyǵy Ǵ.Jetibaev qaraýsyz qalǵan, áleýmettik jaǵdaıy tómen balalardy anyqtaý maqsatynda arnaıy reıdter uıymdastyrlatynyn jetkizdi. Esterińizge salsaq, ótken jyly osy aksıa aıasynda 21656 balaǵa materıaldyq kómek berildi. Onyń ishinde 12918 balaǵa búdjet qarajaty esebinen, qalǵan 8738 balaǵa búdjetten tys demeýshiler qarajaty esebinen materıaldyq kómek kórsetilgen. Aksıa barysynda azamattardyń ótinishterine jedel jaýap berý úshin (24-75-25) senim telefondary jumys isteıtin bolady.
Derekkózi: OQO ákiminiń baspasóz qyzmeti
