Qazaqstan Respýblıkasynyń Eńbek jáne halyqty áleýmettik qorǵaý mınıstrligi bıylǵy jyldyń II toqsanynda ataýly áleýmettik kómek alýshylarǵa tólemderdi III toqsanda uzartýdy kózdeıtin buıryq ázirledi jáne qabyldady. Sonymen qatar, qujatta múgedektik merzimin 3 aıǵa avtomatty túrde uzartý qarastyrylǵan.

Joǵaryda kórsetilgen sharalar azamattardyń koronavırýstyq ınfeksıany juqtyrý qaýpin azaıtý maqsatynda memlekettik ınstansıalarda adamdardyń jappaı jınalýynyń aldyn alýǵa baǵyttalǵan.

Birinshi kezekte AÁK otbasy quramy, turǵylyqty mekenjaıy jáne tabys deńgeıi ózgermegen otbasylarǵa taǵaıyndalady. Áleýmettik kómekti qaıta taǵaıyndaý úshin derekter naqtylanatyn bolady, atap aıtqanda turǵylyqty jeri boıynsha tirkeý (tirkelý), jyljymaıtyn múlik, kólik, kirister jáne basqalardyń bar bolýy. Eger de otbasy quramy ózgermegen jaǵdaıda, ótinishter qolda bar derekter negizinde qurylady. Barlyq aqparat, sondaı-aq habarlamalar elektrondyq poshta nemese messendjerler arqyly jiberiledi.

II toqsanda ataýly áleýmettik kómek almaǵan azamattarǵa AÁK-ti alǵash ret taǵaıyndaý úshin egov.kz portaly arqyly ótinish jiberý qajet. Budan ári jumyspen qamtý ortalyqtarynyń qyzmetkerleri qujattardy memlekettik organdardyń aqparattyq bazalarynda tekseredi jáne nátıjesi týraly elektrondyq poshta nemese messendjerler arqyly habarlaıtyn bolady.

Bul rette ýchaskelik komısıalar kóshpeli tekserýler júrgizbeıdi. Barlyq qajetti qujattar azamattardan elektrondyq poshta arqyly nemese messendjerler arqyly suralady.

2020 jylǵy II toqsandaǵy jıyntyq tabysty esepteý kezinde táýesliz jeke jumyskerlerdiń tótenshe jaǵdaı rejımimen qoıylǵan shekteýlerine baılanysty tabysynan aırylǵan jaǵdaıda biryńǵaı jıyntyq tólemdi jáne áleýmettik tólemdi tóleýge baılanysty aılyq eseptik kórsetkishtiń 25 eselengen mólsherindegi kirisi eskerilmeıdi.

Budan basqa, azyq-túlik jáne turmystyq jınaqtardy satyp alýǵa jáne TJ kezeńinde komýnaldyq qyzmetterdi tóleýge jumsalǵan shyǵyndardy óteýge bólingen aqshalaı qarajattyń mólsheri esepke alynbaıdy.

Múgedektik, jalpy jáne kásiptik eńbek etý qabiletinen aıyrylý dárejesi, sondaı-aq jeke ońaltý baǵdarlamasy, budan burynǵy sıaqty avtomatty túrde uzartylady. Bul shara qaıta kýálandyrý merzimi shekteý sharalary kezeńine kelgen azamattarǵa qatysty bolady.

Múgedektikti alǵash ret belgilegen jaǵdaıda egov.kz portalda «Elektrondyq ótinishter» bóliminde qujattardyń skanerlengen kóshirmelerimen qosa ótinim berý qajet.

16 jáne 18 jasqa tolǵan múgedek balalarǵa qatysty syrttaı qaıta kýálandyrý qarastyrylǵan. Olarǵa múgedektikti qolda bar qujattar negizinde jáne aldyńǵy saýalnamaǵa sáıkes múgedektik dárejesin eskere otyryp belgileıdi.

Medısınalyq-áleýmettik saraptama bóliminiń saraptamalyq qorytyndysyna shaǵym túsken jaǵdaıda saraptama MÁS aktisi men usynylǵan qujattar negizinde syrttaı júrgiziledi.

Aıta keteıik, I toqsanda ataýly áleýmettik kómek alýshylarǵa tótenshe jaǵdaı rejıminiń sol kezdegi qoldanylýyna baılanysty tólemder taǵaıyndaý merzimin II toqsanǵa uzartqan bolatyn. II toqsanda memlekettik ınstansıalarǵa júginbeı, 561 myń qazaqstandyq AÁK-ti avtomatty túrde aldy.

Sol ýaqytta medısınalyq-áleýmettik saraptama júrgizý syrttaı elektrondyq ótinish negizinde retteldi. Karantın engizilgen sátten bastap 5 myńǵa jýyq syrttaı kýálandyrý júrgizildi.

Osy máseleler boıynsha konsýltasıalardy call-ortalyqtan 1411 nómiri boıynsha alýǵa bolady.