Búgin, 9 shilde kúni keshke Jeltoqsan oqıǵasy týraly "Allarjar" atty fılm túsirgen rejıser Qaldybaı Ábenov qaıtys boldy. Bul aqparatty marqumnyń tanystary rastady. 

Rejıserdiń ólimine ne sebep bolǵany áli belgisiz. Buǵan deıin Qaldybaı Ábenovtyń aýyr halde aýrýhanda jatqany habarlanǵan. 

Qaldybaı Ábenov 1951 jyly týǵan. Onyń eń ataqty fılmi – "Allajar". Týyndy 1986 jyly Almatyda bolǵan Jeltoqsan oqıǵasyna arnalǵan. Rejıser bul fılmdi túsirýdi 1989 jyly qolǵa alǵan. Alaıda sovettik Qazaqstan úkimeti 1990 jyly kıno jumysyn toqtatyp tastaǵan. 1991 jyly túsirý jumystary qaıta bastalyp, aqyry aıaqtalǵan "Allajar" týyndysy kópshilik kórermenge biraz ýaqytqa deıin jetken joq. Fılm keıingi jyldary ǵana ınternet arqyly taraldy.

Qaldybaı Ábenov Almatydaǵy Temirbek Júrgenov atyndaǵy Qazaq ulttyq óner akademıasynda 2002 jyldan 2009 jylǵa deıin oqytýshy bolǵan. Ol 2009 jyldyń jeltoqsanda akademıa basshylyǵynyń sheshimimen jumystan shyǵarylǵan. 

Rejıser 2013 jyly ınfarkt pen ınsýltti qatar alǵan soń júrip-turýy qıyndap, júregi men júıkesi álsiregen. Sońǵy jyldary Qaldybaı Ábenovtyń densaýlyǵy qatty nasharlap, arbaǵa tańylyp qalǵan edi. 

2017 jyly 25 jeltoqsanda Qamshy.kz aqparat agenttigi Alash Ordanyń qurylǵanyna 100 jyl tolýyna oraı arnaıy is-shara ótkizgen. Sol kezde rejıser Qaldybaı Ábenov halyqtyń daýys berýi nátıjesinde "Alash izbasary" tós belgisine ıe bolǵan edi.

♦ Oqı otyryńyz: "Allajardyń" avtory, taǵdyr taýqymetin tartqan Qaldybaı Ábenovtiń bir kúni