Elbasy N.Nazarbaevtyń Qyrǵyzstanǵa sapary kezinde Almaty - Ystyqkól avtomobıl jolynyń qurylysy týraly naqty sheshimder qabyldanǵan bolatyn. Eki jaqty jumys toby baǵyttyń tikeleı tıimdi nusqasyn anyqtady: Almaty - Uzynaǵash - Qastek (burynǵy Mıhaılovka aýyly) - Qarasaı batyr - Ystyqkól boıynsha baǵyttalǵan.

Bul týraly "Qamshy" aqparattyq portaly Tengrinews.kz - ke silteme jasaı otyryp habarlaıdy. 

Aldaǵy ýaqytta Qazaqstan aýmaǵy boıynsha Uzynaǵashtan Qastek aýylyna deıingi 42 shaqyrym bolatyn joldy qaıta jóndeýden ótkizý josparlanǵan. Budan ári uzyndyǵy 47 shaqyrym bolatyn jańa jol qurylysy qajet.

Josparlanǵan aýmaqty basyp ótetin jol  teńiz deńgeıinen  2 640 metr joǵary ornalasqan, tóńirek bederi qıyn, serpantın boıynsha shuǵyl órden ótetin Jańa Qastek asýy arqyly ótedi. Asýdan júrip ótkennen keıin baǵyt Eńbek jáne Qarasaı batyr (burynǵy Mıhaılovka aýyly) shekaralyq aýyldary arasymen ótetin bolady. Ol jerlerde 5 myńǵa jýyq adam turady.

Almaty-Ystyq kól jańa baǵyty buryn bolǵan 480 shaqyrym joldyń ornyna 280 shaqyrym bolady.  Osy baǵytty tańdaý Eńbek jáne Qarasaı batyr aýyldaryn Almaty qalasymen baılanystyrýǵa múmkindik beredi, ol osy óńirlerdiń damýyna oń yqpal etedi.

«Almaty-Ystyqkól» jańa jol qurylysy týrızmniń órkendeýine áser etedi, elder arasyndaǵy tranzıt áleýetin arttyrýǵa septigin tıgizedi, sondaı-aq, jaǵymdy áleýmettik-ekonomıkalyq kúsh berip, atalǵan baǵyttyń boıynda ornalasqan eldi-mekenderdiń damýyna mýltıplıkatıvtik áser beredi.