Mınıstr men májilismenniń arasyndaǵy daýǵa núkte qoıyldy.  Núkteni qoıǵan polıseıler bolǵan. 

İshki ister mınıstrligi depýtat Azat Perýashevtyń Bilim jáne ǵylym mınıstri Aslan Sárinjipovke qatysty aryzyn keri qaıtaryp berdi dep habarlaıdy «Qamshy» portaly  KTK arnasyna silteme jasaı otyryp.

Sotqa deıingi tekserý júrgizgen saqshylar Sárinjipovtyń sózinen qylmystyq áreket tappapty.

Jalpy daý májiliste qaralǵan joǵary oqý oryndaryn attestasıadan bosatyp, akredıtasıadan ótkizýge qatysty zań jobasynan bastalǵan edi.

«Aq jol» partıasynyń jetekshisi «dál osy salany ıgere almaı otyrsyń» dep, Bilim mınıstriniń otstavkaǵa ketýi kerektigin aıtqan bolatyn.

Al Sárinjipov Perýashevtyń ózin jeke ýnıversıtetterdiń qyzyǵýshylyǵyn qorǵap júrgen «lobbıst» dep saldy. Buny estigen májilismen shalqasynan tústi. Bul týraly «Qamshy» portaly da jazǵan bolatyn.

Sóıtip, «ar-namysyma kir keltirdi, jumysyma kedergi jasady» dep mınıstrdiń ústinen Bas prokýratýraǵa shaǵymdandy. Sol aryzdy saqshylar eki aıdan asa qarapty. Qylmystyq áreket tappaǵan soń isti sotqa jetkizbeı toqtatqan.

Jalpy Perýashevty Sárinjipov ǵana emes, buǵan deıingi Bilim mınıstri Baqytjan Jumaǵulov ta «lobbıst» dep ataǵan edi. Ol kezde depýtat dál bulaı shamdanbaǵan.