Batys Qazaqstan oblysy Tótenshe jaǵdaılar departamenti qyzmetkerleri Oraldaǵy  órtke oranǵan  ormannan 100-den astam adamdy qaýipsiz aımaqqa jetkizgenin (evakýasıalaǵanyn) habarlaǵan.  Bul týraly «Qamshy» portaly Tengrinews.kz-ke silteme jasaı otyryp habarlaıdy.

Resmı mekemelerdiń málimdeýinshe,  órt 14-tamyz kúni keshki ýaqyttarda bastalǵan. Órttiń qatty kúsh alýynyń saldarynan qalany tútin basyp ketken. Qalalyq órt sóndirý qyzmetkerleriniń jedel jumysy arqasynda órtten 104 adam qaýipsiz aımaqqa shyǵarylǵan. Sondaı-aq,  20-dam astam jeke kólikter qutqarylǵan.  TJD habarlaýynsha, oqıǵa ornynda departament qyzmetkerleri kómek kórsetýde.  Tótenshe jaǵdaılar basqarmasynyń  málimetinshe, órt qurǵaq shópten shyqqan. Órtten qaza tapqandar men jaraqat alǵandar joq.

Órttiń jalpy aýmaǵy 35 gektardy quraǵan. Qazirgi tańda oqıǵa orynynda TJD-nyń 137 qyzmetkeri men 29 birlik tehnıka jumyldyrylǵan. Sonymen qatar, BQO İİD-niń 10 qyzmetkeri men 3 tehnıkasy qyzmet kórsetýde.

Nurzat Toǵjan