Ońtústik Qazaqstan oblysynyń ákimi Beıbit Atamqulov alǵashqy jumys saparynda Shymkent qalasynda kúrdeli jóndeýden ótip jatqan birqatar mektepterdegi jumys barysymen tanysty, dep habarlaıdy OQO ákiminiń baspasóz qyzmetinen.

Oblysta bıylǵy jyly respýblıkalyq jáne oblystyq búdjet esebinen 104 bilim nysanynyń qurylysy qolǵa alynǵan. Onyń ishinde jyl aıaǵyna deıin 67 bilim mekemesiniń qurylysyn aıaqtaý josparlanyp, búginge deıin 37 nysan iske qosylǵan. Paıdalanýǵa berilgen jańa nysandardyń ishinde ǵımaraty apatty dep tanylǵan 19 mekteptiń de qurylysy aıaqtalyp otyr. Jyl sońyna deıin osy sanattaǵy taǵy 10 mekteptiń qurylysyn bitirý josparlanǵan. Qalǵan 27 apatty mekteptiń máselesi 2017 jylǵa deıin kezeń-kezeńimen sheshilmek.

Sonymen qatar, bıylǵy jyly 100 bilim nysanynda kúrdeli jóndeý jumystary júrgizilýde. Qazirgi tańda osy baǵyttaǵy jumystardyń 80 paıyzy aıaqtalǵan. Bilim mekemeleriniń jóndeý jumystaryn oblys aýmaǵynda 25 tamyzǵa deıin aıaqtaý josparda bar.

Jańa oqý jyly qarsańynda bilim mekemeleriniń daıyndyǵyn pysyqtaýdy maqsat etken oblys ákimi bastaǵan jumys toby Shymkenttegi B.Momyshuly atyndaǵy №44 jáne Qazybek bı atyndaǵy №36 orta mektepterindegi jóndeý jumystarymen, Saıram eldi mekenindegi 1200 oryndyq orta mekteptiń qurylysymen tanysty.

Bilim oshaqtarynyń aldaǵy oqý jylyna daıyndyǵyn qadaǵalaǵan oblys basshylyǵy merdigerlerden josparlanǵan jumystardy óz merziminde aıaqtaýdy talap etti. Qurylys barysynda qoldanylyp jatqan qurylys materıaldary sapaly bolýy kerektigin, mektep aýlalarynyń kóriktendirilýi de únemi nazarda bolýy qajettiligin eskertti. Áleýmettik nysandardyń qurylys-montajdaý jumystaryna qajetti jobalaý-smetalyq qujattardy ázirleýde ǵımarattardyń jylý júıelerin jylytý maýsymynda is-júzinde qadaǵalaý máselesi men mektep irgesindegi jer ýchaskelerin sýǵarý júıesin ornatý talaptaryn eskerýdi júktedi. 

Jumys sapary qorytyndysynda bilim oshaqtaryndaǵy atqarylyp jatqan jumystardy oń baǵalaǵan Beıbit Atamqulov mektepterde balalardyń sapaly bilim alýy úshin barlyq jaǵdaı jasalýy kerektigine kóńil bólip, oblys ákimdigi aldaǵy ýaqytta da samannan salynǵan mektepterdiń ornyna zamanaýı bilim oshaqtaryn salý jóninde naqtyly sharalardy atqaratynyn aıtty.

Derekkózi: QazAqparat