Qazaqstanda týǵan Azıanyń vıse-mıssi Janna Stınson «Borat» fılmi úshin Azıa arýy baıqaýyna qatysqanyn málimdedi.

Bul týraly «Qamshy» portaly «Týmbaǵa» silteme jasaı otyryp jazady.

Janna Stınson (negizge tegi - Dosmuhametova) Qazaqstanda týǵanymen, qazir ol AQSH-ta turady.

Aqtaý qalasynyń týmasy amerıkalyq basylymǵa bergen suhbatynda ol Azıa arýy baıqaýyna amerıkalyqtardyń Qazaqstanǵa degen kózqarasyn ózgertý úshin qatysqanyn aıtqan.

Byltyrǵy jyly AQSH-ta ótken «Azıa arýy»  «Miss & Mrs Asia USA» baıqaýynda ol 30 eldiń  arasynan Qazaqstannyń namysyn qorǵaǵan jalǵyz qyz bolǵan.  Jarys nátıjesinde jerlesimiz 2-oryndy ıelengen.

«Bizge júktelgen talaptar boıynsha, biz túrli qaıyrymdylyq sharalaryna qatysyp, jetim-jesirlerge kómek berip turýymyz kerek. Sondaı-aq,  kez kelgen jaǵdaıda jýrnalıserdiń suraǵyna jaýap taba alýymyz qajet. Men balalyq shaǵymdy Qazaqstannyń kishkentaı bir aýylynda ótkizdim. Qazaq saltynda qalyptasqandaı meni ájem tárbıeledi. Bizdiń aýylymyz Ortalyq Azıanyń shalǵaı bir túkpirinde ornalasqan edi. Men ájeme qarap, úı sharýasymen aınalystym. Bul maǵan unaıtyn da. Sebebi, men úlken kisilerdiń qasynda bolǵandy jaqsy kóretinmin. Olardan úırenerimiz de kóp qoı. Bul meniń ómirimdegi umytylmas kezeńderdiń biri edi»,-deıdi Janna hanym  amerıkalyq  «HOLLYWOOD WEEKLY» jýrnalyna bergen suhbatynda.

«Men bul baıqaýǵa birneshe sebeppen qatystym. Birinshiden, men bul baıqaýǵa bir saıys sekildi qaraǵan joqpyn.  Meniń jalǵyz maqsatym – Qazaqstannyń mádenıetin álem elderine pash etý boldy.  Meniń baıqaǵanym, «Borat» fılminen keıin kóptegen amerıkalyqtar Qazaqstan týraly ózgeshe oılaı bastaǵan.  Bul árıne, jańsaq túsinik jáne oǵan olar kináli emes te. Tek olar solaı kórdi. Al shyn máninde Qazaqstan qandaı memleket?! Mádenıeti tunyp turǵan, qazba baılyqtary mol tamasha memleket qoı. Meniń maqsatym amerıkalyqtardyń kózin osyǵan jetkizý boldy»,-deıdi Janna hanym.

Nurzat Toǵjan