QR Prezıdenti Nursultan Ábishuly el ekonomıkasynda mundaı jaǵdaıdyń buryn bolmaǵanyn aıtyp, úlken qaýip tónip turǵanyn eskertti. Bul týraly «Qamshy» portaly KTK arnasyna silteme jasaı otyryp habarlaıdy.
Aqordada jıyn ótkizgen Qazaqstan Prezıdenti kezdesý kezinde álemdik naryqtaǵy jaǵdaıdyń nasharlaýy jaǵdaıynda qazaqstandyq ekonomıkanyń ósýin qamtamasyz etý boıynsha baǵyttardy talqylaǵan. Memleket basshysy Qazaqstan ekonomıkasyna uzaq merzimde áser etýi múmkin jaǵymsyz faktorlardy atady.
1. Munaı men metal baǵasynyń tómendeýi aldaǵy bes jyl kóleminde saqtalýy múmkin.
2. Damýshy elderdiń ınvestısıa men kapıtalǵa qoljetimdiligi shektelýi múmkin.
3. Qazaqstandyq ónimniń saýdasy negizgi seriktesterimizdiń, Reseı men Qytaıdyń tarapynan bolyp jatqan suranysynyń álsireýinen naryq qysymǵa ushyrap jatyr.
«Prezıdent qalyptasqan jaǵdaıdyń memleketten búdjettik jáne monetarlyq saıasatty teńdestirýdi qamtamasyz etý boıynsha aldyn alýdyń tıimdi sharalaryn ótkizýdi, sonymen qatar, ekonomıkalyq damýdy júzege asyrý maqsatynda jahandyq qıyndyqtarǵa qarsy is-qımyldy talap etetinin aıtty»,-dep jazady tengrinews.kz.
Memleket basshysy jańa ekonomıkalyq jaǵdaıda munaıdyń barreli úshin 30-40 dollar baǵasyna beıimdelýdiń qajettiligin atap ótti.
Prezıdent sózin paıymdaı kele ańǵaratynymyz, aldaǵy ýaqytta qarjylyq qıyndyq Qazaqstandy qos búıirden qysqaly tur. Sondaı-aq, álemdik munaı baǵasynyń kúrt tómendeýine baılanysty búdjettiń túsimi de jarty trıllıon teńgege azaıyp otyr.
Nursultan Nazarbaev 2018 jylǵa deıin respýblıkalyq búdjet defısıtin 1 paıyzǵa deıin túsirýdi tapsyrdy. Ol defısıtti qarjylandyrýdyń ishki rezervter arqyly júzege asyrylýy kerektigin atap ótti.
Ol ekonomıkanyń básekelestik artyqshylyqtary bar negizgi salalaryna qoldaý bildirýge basymdyqtyń berilýi kerektigin aıtty.
"Qoıylǵan mindetterdi júzege asyrýdyń mańyzdy tusy - damýdyń osyǵan uqsas jolyn júrip ótken ári ekonomıkalyq jaǵdaıy uqsas elderdiń tájirıbesi. Bul - Avstralıa men Kanadanyń sońǵy 30 jyldaǵy tájirıbesi. Taýar jetkizýdiń jahandyq tizilýine Qazaqstannyń aldaǵy onjyldyqtarda úlken múmkindikteri bar", - dedi Memleket basshysy.
Nurzat Toǵjan
