Baıqońyr qalasynyń Reseı Federasıasyna jalǵa berilgen aýmaqtarynda 1,9 mln tonna zańsyz qurylys qaldyqtary jatyr. Bul týraly májilis depýtattarynyń saýalyna oraı premer-mınıstr Asqar Mamınniń jaýabynda aıtylǵan.

– "Baıqońyr" kesheniniń 5 alańynda (№9, 9G, 9TZB, 15G jáne 20) ruqsat etilmegen oryndarda ornalasqan qurylys jáne basqa da qaldyqtar Reseı Federasıasyna jalǵa berilgen jer ýchaskelerinde ornalasqan. 2018 jyly múddeli memlekettik organdar qatarynan (QR EGTRM, Baıqońyr qalasynyń ákimshiligi, Reseı federaldy bıomedısınalyq agenttigi) komısıa quryldy, ruqsat etilmegen qoqys oryndary men jer ýchaskelerin ornalastyrý sqemasy jasaldy. Túziletin qaldyqtardyń oryndary, kólemi jáne olardyń morfologıalyq quramy anyqtaldy, – dedi premer-mınıstr.

Onyń aıtýynsha, joǵaryda atalǵan komısıanyń jumysyn túgendeý aktisine sáıkes Baıqońyr qalasynyń aýmaǵynda ruqsat etilmegen jerlerde ornalasqan qıraǵan ǵımarattar men qurylystardyń jáne basqa da qaldyqtardyń jalpy kólemi 1,9 mln tonnany quraıdy.

– Ekologıa, geologıa jáne tabıǵı resýrstar mınıstrligi Baıqońyr qalasy ákimshiliginiń basshysyna qala aýmaǵyn Qazaqstan Respýblıkasynyń ekologıalyq zańnamasynyń talaptaryna sáıkes keltirý jóninde túbegeıli sharalar qabyldaý týraly hat joldady. Qazirgi ýaqytta ekologıa, geologıa jáne tabıǵı resýrstar mınıstrligi Qyzylorda oblysynyń ákimdigimen birlesip, Reseı tarapymen osy máseleni pysyqtaýdy jalǵastyrýda, – dedi Asqar Mamın.