Nur-Sultan qalasynda Qazaqstannyń Memlekettik hatshysy Qyrymbek Kósherbaevtyń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komısıanyń birinshi otyrysy ótti. Bul týraly Aqorda saıty habarlady.
Bıyl 24 qarashada memleket basshysy Qasym-Jomart Toqaev "Saıası qýǵyn-súrgin qurbandaryn tolyq aqtaý jónindegi memlekettik komısıa týraly" Jarlyqqa qol qoıǵan bolatyn.
Memlekettik hatshynyń aıtýynsha, memlekettik komısıanyń basty mindeti – keńestik kezeńdegi saıası qýǵyn-súrgin qurbandarynyń barlyq sanattaryna qatysty tarıhı ádilettilikti tolyq qalpyna keltirý.
Materıaldarǵa jan-jaqty ári keshendi zerdeleý júrgizgennen keıin, halyqaralyq tásilder men standarttar negizinde tolyqtaı zańdy, al jekelegen sanattarǵa qatysty – qýǵyn-súrgin qurbandaryn saıası aqtaý josparlanyp otyr.
Otyrys barysynda Memlekettik komısıanyń qyzmetin uıymdastyrýdyń mindetteri men negizgi sátteri, onyń 2020-2021 jyldarǵa arnalǵan jumys jospary, qýǵyn-súrgin qurbandarynyń túrli toptaryn aqtaý jónindegi qyzmetti ádisnamalyq qamtamasyz etý máseleleri qaraldy.
Qýǵyn-súrginge ushyraǵan ár túrli toptardy aqtaý baǵyttaryn pysyqtaý úshin arnaıy jumys toptaryn qurý usynyldy.
Otyrys sońynda Qyrymbek Kósherbaev múddeli memlekettik jáne jergilikti atqarýshy organdarǵa birqatar tapsyrma berdi.
