QazUÝ stýdentteri men Almaty qalasynyń eriktileri japyraqtan uly oıshyl Ábý Nasyr ál-Farabıdiń portretin jasap shyqty.

Elimizdiń jetekshi ýnıversıteti ál-Farabı atyndaǵy QazUÝ-dyń stadıonynda erekshe týyndy – ál-Farabıdiń beınesi paıda boldy, bul kezdeısoqtyq emes. Ýnıversıtet álemde adamzattyń Ekinshi ustazy atalatyn uly fılosof ári ǵalymnyń esimimen atalady. Bıyl IýNESKO qaramaǵynda ál-Farabıdiń 1150 jyldyǵy halyqaralyq deńgeıde atalyp ótilýde. Jastar bul kórkem týyndyny mereıtoılyq jylǵa arnady. 

"QazUÝ shyǵarmashylyq topqa kúrdeli kórkemdik sharany uıymdastyrýǵa qolǵabys etti. Ideıany júzege asyrý úshin tańnan keshke deıin eki kúndik daıyndyq jumystary júrgizilip, Almaty parkteri men saıabaqtarynan jınalǵan birneshe júk kólik japyraqtary jumsaldy. QazUÝ stadıony qoldan jasalǵan bıiktigi 76 metr jáne eni 66 metrdi quraıtyn orasan zor ál-Farabıdiń ǵajaıyp portretimen bezendirildi. Erekshe shyǵarmashylyq flesh-mobtyń qatysýshylarynyń pikirinshe bul uly oıshyldyń álemdegi eń úlken beınesi. Al, ony jasaýǵa ál-Farabıdiń qazaq jerinde týylýy jáne ortaǵasyrlyq eýropalyq Renesansqa bastaý bergen ǵulamanyń baı shyǵarmashylyq murasy eriktilerge shabyt berdi", - delingen habarlamada. 

Ál-Farabıdiń portretin japyraqtarmen beınelegen – jas sýretshi Djohar Iýnýsov, ol belgili tulǵalardyń, tarıhı qaıratkerlerdiń jáne zamandastarymyzdyń beınelerin ártúrli materıaldardan jáne qalyptan tys túrde jasaıdy. Oǵan qalanyń ár túrli ýnıversıtetterinen kelgen nıettesteri kómektesedi. Jaqynda ǵana talantty jas jigit úlken avtoturaqta Abaıdyń portretin sýmen «beınelep», bul týyndysyn qazaqtyń uly aqyny men aǵartýshysynyń 175 jyldyǵyna arnady. 

Ushar bıikten ál-Farabıdiń portreti tek óziniń kólemimen tańǵaldyryp qana qoımaı, sonymen birge oıshyldyń kózqarasynan beıne bir ózderiniń otandasyn jadynda saqtap, onyń qaıyrymdylyq, birlik jáne ózara kómek kórsetý týraly baǵa jetpes ıdeıalaryn qoldanyp kele jatqan óz týǵan jerindegi otandastaryna degen rızashylyqty ańǵarýǵa bolady.