Qazaqstannyń negizgi óndiristik ekonomıkasy, onyń ishinde aýyl sharýashylyǵynyń negizgi salalary koronavırýs indetiniń ákelgen ekonomıkalyq quldyraý soqqysyna qarsy tótep bere aldy. Osy rette memleket tarapynan bıznesti qoldaýǵa bólingen qomaqty qarajattyń kómegi zor boldy. Bul pikirdi qazaqstandyq ekonomıs Almas Chýkın atap ótti.
«Jalpy aıtatyn bolsam, Qazaqstan pandemıanyń ákelgen ekonomıkalyq saldarymen jaqsy kúresip jatyr. Ekonomıkalyq qaýipterdi 3-4% shamasynda tómendetkeni jaman emes. Negizgi óndiristik salalar, sonyń ishinde aýyl sharýashylyǵy daǵdarysqa qarsy kúres júrgizip jatyr», - dedi Almas Chýkın.
Ekonomıs sonymen qatar karantındik shekteýlerdiń agrarlyq sektordaǵy kásiporyndardyń jumysyna aıtarlyqtaı áser etpeıtindigine nazar aýdardy. Ekonomıkanyń báseńdeý jaǵdaıynda úkimettiń aralasýy, onyń ishinde qazynadan qarjy bólý sharalary mańyzdy ról atqardy. Dúnıejúzilik banktiń málimetteri boıynsha, shilde aıyndaǵy Qazaqstan úkimetiniń daǵdarysqa qarsy sharalar kesheniniń paketi – 10,1 mıllıard AQSH dollaryn nemese respýblıkalyq jalpy ishki ónimniń 5,7% quraıdy.
«Bul kómek aıtarlyqtaı septigin tıgizdi. Áıtpese budan da qıyn jaǵdaıda qalýymyz múmkin edi», - dedi Almas Chýkın.
Osyndaı memlekettik qoldaýdyń bir mysaly retinde osy jyldyń naýryz aıynda kásipkerlerge 600 mıllıard teńgeniń jeńildikpen nesıelendirý baǵdarlamasynyń bastalyp, kúzde taǵy 200 mıllıardqa deıin keńeıtilgenin aıta alamyz. Ekonomıkalyq baqylaýshy Iýrıı Masanov osy baǵdarlama aıasynda agroónerkásip keshenine arnyıy kómek bólingenine nazar aýdardy. Bul baǵytqa 100 mıllıard teńgege deıin qarjy bólindi, onyń 70 mıllıardy bankter arqyly, taǵy 30 mıllıardy «QazAgro» UBH » AQ enshiles kásiporny «Agrarlyq nesıe korporasıasy» AQ arqyly úlestirildi.
Sarapshynyń aıtýynsha, «Agrarlyq nesıe korporasıasynyń» ózi jeńildetilgen nesıelendirý arqyly agrarlyq sektordy jandandyrýǵa aıtarlyqtaı úles qosýda.
«Pandemıa aıasynda da aýyl sharýashylyǵy óz damý jolyn jalǵastyrýda. Osy jyldyń alǵashqy úsh toqsanynyń qorytyndysy boıynsha ónerkásipte ónim kólemi 5,4 trln teńgege jetken, bul ótken jylǵy deńgeıden 5,2% joǵary», - dep atap ótti Iýrıı Masanov.
Agrarlyq nesıe korporasıasynyń nesıelik portfeli úshinshi toqsandaǵy qorytyndy boıynsha 529,5 mlrd teńgeni qurap, bir jyl ishinde 28%-ǵa ósti. Suhbat bergen sarapshylardyń aıtýynsha, mundaı jeńildetilgen nesıeniń kóbeıýi bıznestiń damýyna da, aýyldyq jerlerdegi ómir sapasyna da tikeleı oń áser etedi.
Masanovtyń aıtýynsha, sońǵy bes jyl ishinde, «Agrarlyq nesıe korporasıasy» qarjylandyrýynyń arqasynda, elde 10 000 nan astam jańa jumys orny quryldy. Bul qazaqstandyq mamandar men olardyń otbasylary úshin turaqty tabys kózine aınalyp otyr.
Pikir qaldyrý