Ekeýi de qatardaǵy kóldeneń kók atty emes; oıy kem, moıyny bos, ońaı shaǵylar jańǵaq ta emes...Birinshisi - alashtyń adýyndy hám oraldyń oraq tildi aıtysker aqyny Baýyrjan HALIOLLA. Aıtysta aldyna teksiz tuıaq túsirmegen kóptegen halyqaralyq, respýblıkalyq aıtystardyń jeńimpaz-júldegeri, «Jumbaq qyzdyń janary» («Jazýshy» baspasy, 2001), «Názik bult kóship barady» (Oral, 2005), «Juldyz jaýǵan jaryq tún» (2012 jyl, Oral) atty jyr jınaqtarynyń avtory Baýyrjan Batys Qazaqstan oblysy, Syrym aýdanynyń Qosoba aýylynda 1979 jyly dúnıege keldi.
«...Minezim úshin óte kóp taıaq jedim. Biraq kózben kórip turǵan nárseni qalaı burmalap jetkizesiń? Jaǵympazdyq qanyma jat...» – deıtin Ál-Farabı atyndaǵy Qazaq ulttyq ýnıversıteti jýrnalısıka fakúltetiniń túleginiń jumyr basyna ne zaýal soqpady dersiń?!.
Qashanda bir sheńberdiń aıasyna syımaı oıyn erkin jetkizip, kóbine jumyssyz júretin Baýyrjan Qalıollanyń: «Ákemnen segiz jasqa tolar-tolmas shaǵymda jetim qaldym. Sodan keıingi kórgen sheshemniń beıneti kóz aldymda. Endi qyzyq kórem be degende, máńgilik uıqyǵa kete bardy. Eger menen «ókinishińiz ne?» dep surar bolsa, «Anamdy baqytty ete almaǵanym» der edim. Alladan keıingi adamzattyń asyly analar – sender aman bolyńdarshy. Biz sizderdi aıalaý úshin jaralǵanbyz» – degen jan syry mıllıondaǵan adamdardyń júregin jylytyp, jandaryn muńǵa kómdi...
... Sóz joq, «Aıtysqa qýaryp kelip, qýanyp qaıtamyn» degen Halıolla báribir eliniń taǵdyryna eleńdemeı júre almady, kózboıaý jasalǵan jalǵan sharýalardy; topas-toǵysharlardyń mysyqtileýligin jumsartyp aıtyp, janamalap jetkizdi. Aqyrynda: «Qyrymbek Kósherbaev ketkeli bizdegi mádenı saladan mán ketti. Mádenıetimiz múgedek, ádebıetimizdiń jaǵdaıy áljýaz kúıge tústi» degen tujyrymmen toqtap, dem basty...
Iá, aqynnyń alasapyran ishki-álemi Jaıyqtyń tolqyndaryndaı tynym tappaı, talaı shaıqalyp, shyryn tolǵamdar aıtty:
1. «Meniń barlyq taǵdyrym kóne shaHar Oralmen, kári ózen Aq jaıyqpen tyǵyz baılanysty...»
2. «Kóńilim dalany ańsaıdy da turady. Tas qalanyń tas baýyr tirshiligi adamdy baýyrmaldyqtan, meıirimnen, odan qalsa, tabıǵı shynaıy sezimnen alshaqtatyp jiberedi...»
3. «Men, negizi, Qudaı mańdaıyma nesibesin mol jazǵan adammyn.»
...Ras eken. Bir burylys-bulqynysta: «Meniń alańdaıtynym, aıtys ónerinde Batys óńirinde ósip kele jatqan órimdeı jastar kóp. Átteń, mańdaıynan sıpaıtyn adam joq. Oıyma alǵan josparym jeterlik, qaısysyna úlgerip, ne uqsatarymdy ýaqyt kórseter…» - degen Baýyrjan Halıolla baýrymnyń nesibesi násip bolyp, oblystyq Jastar shyǵarmashylyq ortalyǵynyń dırektory oryntaǵyna otyrdy.Baıandy bolsyn!
...Atqa qonǵan Aq Jaıyqtyń taǵy bir arda uly – Artýr NYǴMETOV. Artýr – pýblısıs, saıasattanýshy. 2007 jyly Batys Qazaqstan memlekettik ýnıversıtetiniń Tarıh fakúltetin támamdady. Máskeý saıası zertteýler mektebiniń túlegi. Shvesıadaǵy SIPU International (Stokgolm, 2008) memleket jáne jergilikti basqarý ınstıtýty men Konrad Adenaýer Qorynda (Berlın, 2012) taǵylym-synaqtarynan ótken. «Nazarbaev Ortalyǵynda» bas sarapshy da boldy.
Qazaqtyń muń-múddesin týra aıtyp, baǵytynan jańylmaǵan Artýr inimiz 2012 jyly «Halyq qalaýlysy» syılyǵynyń «Úzdik pýblısıs» nomınasıasy boıynsha laýreat atandy. 2014 jyldan beri «Smart Advice» komýnıkasıalyq tobynyń basqarýshy seriktesi bolyp, jyl sońynda «Nur Otan» partıasynyń Qoǵamdyq Saıasat Instıtýty dırektorynyń shtattan tys keńesshisi qyzmetine kiristi. Munda Nyǵmetovke ınstıtýttyń jobalaý isteri boıynsha táýelsiz keńester berý mindetteri júkteldi.
Órkenı zamannyń tyń tetikterin tolyq meńgerip, álemniń birneshe elderiniń tájirıbelerin boıyna tereń sińirgen Artýr Nyǵmetov Almaty qalasynyń ákimi Baýyrjan BAIBEKtiń baspasóz qyzmeti jetekshiligine taǵaıyndalady.
Qajymuqan ǴABDOLLA
