Mańǵystaý oblysynan shyqqan bir top aqyn, jazýshy, etnograf, tarıhshy depýtat Bozjyra aýmaǵyndaǵy jańa týrızm jobalaryn qurýyn qoldap prezıdent Q.Toqaevqa úndeý joldady.
"Asa qurmetti Qasym-Jomart Kemeluly! Biz, mańǵystaýlyq zıaly qaýym ókilderi, ata-babalarymyzdyń jáne keleshek urpaǵymyzdyń aldyndaǵy mindetter men jaýapkershiligimizdi sezine otyryp, Ózińizge úndeý joldaımyz" dep bastalatyn úndeýde bıyl teńiz jaǵalaýynda bes juldyzdy Rixos qonaqúıiniń ashylýymen, óńirge kelgen týrıser sany artqanyn, saıahattaýshylar Mańǵystaýdyń tabıǵı jerlerin de aralap, ásirese Bozjyra shatqalyna qyzyǵýshylyq tanytyp jatqanyn aıtady.
"Jabaıy" týrızmge toqtaý salynýy kerektigin alǵa tartqan úndeý joldaýshylar ǵalymdardan quralǵan top Bozjyra aımaǵyna, onyń florasy men faýnasyna zıan keltirmeıtin jobany iske asyrýǵa bolady degen qorytyndyǵa kelgenin jetkizgen.
"Bul sheshim halyqtyń júregine jol tapqany sózsiz. Bul usynys óńirimizdiń damýyna oń yqpalyn tıgizetindigin barlyǵymyz da túsinemiz:
Birinshiden, munaıǵa ǵana táýeldilikti joıyp, týrızmdi damytý arqyly ekonomıkamyzdy órkendetemiz. Shaǵyn jáne orta bıznestiń damýyna, jergilikti azamattardyń jumyspen qamtylýyna jol ashamyz. Qonaq úı qurylysy jumysy bastalsa, osy mańdaǵy aýyl turǵyndaryn jumyspen qamtýǵa múmkindik bar.
Ekinshiden, bul keshen týrıserdiń Bozjyraǵa óz betinshe beıbereket baryp, tabıǵatqa orasan zıan keltirýine tosqaýyl bolady. Sondyqtan, bul aımaqqa baratyn jol salyp, týrıserdiń jaıly demalýyna jaǵdaı jasalýymen qatar, zańnamalyq aktilermen tıisti Qaǵıdalardyń bekitilýine senimdimiz. Iaǵnı, Bozjyra aýmaǵynda salynatyn týrızm ınfraqurylymy tabıǵatty qorǵaý, saqtaý jáne jergilikti tarıhı-tabıǵı oryndardyń sakraldylyǵyn saqtaý, jergilikti dil, tanym-ǵuryptyq qundylyqtarymyzdy eskere otyryp, órkenıetti jolmen týrızm mádenıetin qalyptasqanyn qalaımyz!" delingen úndeý mátininde.
Úndeý avtorlary joba sarapshylar, qoǵamdyq keńester men jaýapty sala jetekshileriniń oı-pikirlerin eskere otyryp júzege asyrylatyndyǵyna senim bildirgen.
Prezıdentke joldanǵan úndeýge tómendegideı adamdar qol qoıǵan:
Bektur Tóleýǵalıev, jazýshy, QR jazýshylar Odaǵynyń múshesi;
Sabyr Adaı, aqyn, QR eńbek sińirgen qaıratkeri;
Otynshy Kóshbaı, etnograf, ólketanýshy;
Svetqalı Nurjan
Aıtman Aıtman, aqyn, QR jazýshylar Odaǵynyń múshesi;
Ǵalym Árip, aqyn, QR jazýshylar Odaǵynyń múshesi;
Aıtýar Ótegenov, aqyn, QR jazýshylar Odaǵynyń múshesi;
Nurlan Qulbaı, ólketanýshy, QR mádenıet salasynyń úzdigi;
Ánýar Bımaǵambet, aqyn, QR jazýshylar Odaǵynyń múshesi;
Andreı Astafev, tarıhshy, arheolog;
Sultanbek Qudaıbergen, aqyn, ónertanýshy;
Saqyp Kerelbaev, qoǵam qaıratkeri;
Qoja-Ahmet Demeýbergenuly, QR qurmetti jýrnalısi;
Edil Jańbyrshın, depýtat;
Samat Mýsabaev, depýtat.
Byltyr qarasha aıynda Bozjyra shatqaly mańynda qonaqúı salý jospary bary belgili boldy. Bul qoǵamda qyzý talqylanyp, jobaǵa qarsylyq tanytýshylar kóp boldy. Artynsha prezıdent Q.Toqaev máselege kóńil aýdaryp, jobany qaıta qaraýdy tapsyrǵan. Artynsha Mańǵystaý oblysynyń ákimi Serikbaı Turymov qonaqúı Bozjyradan bir-eki shaqyrymǵa aryrar jerge salynatynyn habarlady. Jobaǵa qarsy shyǵyp júrgen belsendiler qonaqúıdi kemi Bozjyradan 20 km jerge salý kerek dep sanaıdy.
Al 8 aqpanda belsendiler Bozjyrada VIP-qonaqúı salý jobasyna qarsy onlaın-petısıaǵa qol qoıýdy bastady. Petısıa avtory Ajar Jandosovanyń aıtýynsha, Bozjyrada týrızmdi damytý úshin birinshi kezekte tabıǵı baılyqty jáne baǵa jetpes ǵaryshtyq landshafttardy saqtaýǵa múmkindik beretin barlyq jaǵdaı jasalýǵa tıis.
"Biz, jobada eskerilgen jerde, atap aıtqanda, Azýlardan 4 km jerde, Jabaıushqan qoryǵynyń shekarasynan 495 m qashyqtyqta qonaqúı salýǵa úzildi-kesildi qarsymyz. Qonaqúı Bozjyranyń barlyq baqylaý núktelerinen anyk kórinetin bolady, al onyń qurylysy men qyzmeti búkil tiri álem úshin óte kúshti alańdaýshylyq faktory. Bul qonaqúıdiń bolýy Bozjyranyń sulýlyǵyn joǵaltýǵa, bıosıstemaǵa, shatqaldyń tabıǵı jáne tarıhı qundylyǵyna orny tolmas zıan keltirýge, týrısik tartymdylyqty joıýǵa soqtyrady. Qazaqstandyq bıoalýantúrlilikti saqtaý qaýymdastyǵynyń saraptamalyq usynysy boıynsha Bozjyradan 20-25 km qashyqtyqta qonaqúı qurýdy qarastyrýǵa bolady, bul órkenıetti álemde "jaqyn qashyqtyq" bolyp sanalady" delingen petısıa úndeýiniń mátininde.
Bozjyra taýy – oblys ortalyǵy Aqtaý qalasynan 300 km qashyqtyqta ornalasqan, Qaraqıa aýdanyna qarasty Ústirt platosynyń batys shyńdary bóligi, Ústirt jazyǵy shyńdarynyń bir bóligi. Bıiktigi – 250 m.
Pikir qaldyrý