Búgin, 9 qyrkúıekte, Ońtústik Qazaqstan oblysy ákimdiginiń qoldaýymen Qazaqstan Respýblıkasynyń Prezıdenti janyndaǵy Ortalyq komýnıkasıalar qyzmetiniń oblystyq fılıaly ashyldy.
Ashylý saltanatyna oblys ákimi Beıbit Atamqulov qatysyp, bul ortalyqtyń elimizdegi bas suhbat alańyna aınalatynyn aıtty.
«Ótken jyldan bastap Qyzmettiń aımaqtardaǵy fılıaldary ashyla bastady. Búgin kezek shyraıly Shymkent qalasyna da jetti. Bul óńirdiń aqparattyq salasy úshin aıtýly oqıǵa. Ortalyq komýnıkasıalar qyzmetiniń fılıaly aımaqtaǵy memlekettik mekemeler jumysynyń halyqqa ashyqtyǵyn arttyrýǵa jáne jurtshylyqtyń memleket jumysy týraly kóbirek aqparat alýyna jol ashatyn birden-bir suhbat alańyna aınalatynyna senimdimin», – dedi oblys basshysy.
Atalǵan is-sharada «Ult jospary «100 naqty qadam» aıasynda Ońtústik Qazaqstan oblysynda kásipkerlikti damytý jáne ındýstrıalandyrý baǵdarlamasynyń júzege asyrylýy» taqyrybynda alǵashqy onlaın-brıfıng uıymdastyryldy.
Baspasóz konferensıasyna oblys ákiminiń orynbasary S.Tuıaqbaev pen «Hlopkoprom selúloza» JSHS bas dırektory Q.Abasov qatysty.
Oblys ákiminiń orynbasary S.Tuıaqbaev óńirdiń ındýstrıaldy-ınnovasıalyq damýy týraly aıtty. Sonymen qatar, «Hlopkoprom selúloza» JSHS bas dırektory Q.Abasov teńge kýrsynyń ózgerýi búgingi tańda eksporterlar úshin tıimdi bolyp turǵanyn aıtty. Sebebi, álemdik naryqta ótken jyly maqta shıkizatynyń kelisi 75-80 teńge bolsa, bıylǵy baǵa 100 teńgege kóteriledi dep kútilýde. Bul óz kezeginde sharýalardyń ótken jylmen salystyrǵanda 20 jáne odan da kóp paıyz mólsherinde paıda tabýyna múmkindik beredi.
Búginde OQO – transporttyq-logıstıkalyq ınfraqurylymy damyǵan, ekonomıkalyq jáne týrısik áleýeti joǵary, zamanaýı telekomýnıkasıalyq júıemen qamtylǵan aımaq retinde qarjy salýǵa bar jaǵdaıy jasalǵan óńir.
Eske salaıyq, Shymkenttegi fılıal Ortalyq komýnıkasıalar qyzmetiniń óńirlerdegi segizinshi keńsesi bolyp tabylady. Mundaı ortalyqtar Almaty, Atyraý, Qyzylorda, Aqtaý, Kókshetaý, Pavlodar jáne Óskemen qalalarynda jumys isteıdi.
OQO ákiminiń baspasóz qyzmeti
