Ál-Farabı atyndaǵy QazUÝ Qytaı Úkimetiniń granty boıynsha 10 mln. dollardyń sýperkompúterin alatyn boldy. Bul týraly «Qamshy» portaly habarlaıdy. Elbasynyń Qytaı Halyq Respýblıkasyna jasaǵan memlekettik sapary barysynda osyndaı ýaǵdalastyqqa qol jetkizildi.
Bir sekýndta júz on trıllıon operasıany(110 Tfl) júzege asyra alatyn sýperkompúterdi elimizdegi jetekshi QazUÝ-ǵa Qytaıdyń «INSPUR» kompanıasy beredi. Buǵan arnalǵan grant qarajaty Qytaı Úkimeti tarapynan bólinedi.
Qytaı Tóraǵasy Sı Szınpınniń bıylǵy mamyr aıynda Qazaqstanǵa jasaǵan sapary barysynda Qazaqstan Prezıdenti Nursultan Nazarbaev eki el arasyndaǵy ǵylymı-tehnıkalyq yntymaqtastyqty odan ári damytý maqsatynda «Silicon Valley» modeli boıynsha birlesken IT- tehnologıalyq parkin qurýdy usyndy.
Memleket basshysynyń ıdeıasyn iske asyra otyryp, QazUÝ Jańa Jibek Joly Ýnıversıtetter Alánsynyń halyqaralyq IT-tehnoparkin qurý jóninde bastama kóterdi. Ol QazUÝ bazasynda sýperkompúter jáne bult arqyly zertteý negizinde qurylady.
Elbasy N. Nazarbaevtyń Qytaıǵa memlekettik sapary barysynda ál-Farabı atyndaǵy QazUÝ men «INSPUR» kompanıasynyń jetekshileri yntymaqtastyq týraly memorandýmǵa qol qoıdy. Bul qujatta jobany iske asyrý boıynsha birlesken is-árekettiń negizgi baǵyttary belgilendi.
Atap ótken jón, QazUÝ ındýstrıaldyq- ınovasıalyq damý jónindegi memlekettik baǵdarlama boıynsha QazUÝ aqparattyq komýnıkasıalyq tehnologıalar salasyndaǵy joǵary bilikti mamandar daıyndaıtyn ortalyq retinde tańdaldy. Bul úshin QR ınvestısıalar jáne damý jónindegi mınıstrlikpen birlesip, biregeı «Tehnoloft» ınovasıalyq klaster qurylyp jatyr. Atalǵan klaster ınovasıalyq sheberhanalary men ózegi sýperkompúter bolyp tabylatyn IT - tehnoparkti qamtıdy.
Qazaqstan men Qytaıdyń aqparattyq-kommýnıkasıalyq tehnologıalar salasyndaǵy yntymaqtastyqty tereńdete túsýi ǵylym men bilim salasyndaǵy memleketaralyq qarym-qatynasty jańa deńgeıge kóteredi. Shanhaı yntymaqtastyǵy uıymyna múshe elderdiń ǵylymı-tehnıkalyq ózara yqpaldastyǵy sheńberinde birlesken zertteý jobalaryn júzege asyrýdyń múmkindigin keńeıtedi. Sonymen qatar bul Qazaqstan Prezıdentiniń «Nurly jol – Bolashaqqa bastar jol» Joldaýymen úndesetin jańa Jibek Joly ekonomıkalyq beldeýin qurý jónindegi memleketaralyq aýqymdy jobany júzege asyrýǵa óz yqpalyn tıgizedi.
