Tarıhshy, kartograf, Germanıanyń Gýmbold qory stıpendıasynyń ıegeri, qazirgi tańda Garvard ýnıversıteti Herbenk zertteý ortalyǵynyń zertteýshisi, profesor Nurlan Kenjeahmettyń aıtýynsha, ǵalymnyń qazaq tarıhyna qatysty mańyzdy ǵylymı jobasy Qazaqstannyń Bilim jáne ǵylym mınıstrligi tarapynan toıtarylǵan. Al sol jobasy úshin Garvard ýnıversıteti kartografty jumysqa shaqyrǵan.

– 2007 jyly Japonıanyń Kıoto qalasyndaǵy Adamzat jáne tabıǵattaný ınstıtýtynda tarıhı zertteý jumystarymen aınalystym. Japondar Batys Túrik qaǵanatynyń astanasy Sýıab qalasy týraly eńbegimdi joǵary baǵalap, japonshaǵa aýdardy,–degen tarıhshy 2008 jyldan bastap, R. B Súleımenov atyndaǵy Shyǵystaný ınstıtýtynda jáne L.N Gýmılev atyndaǵy Eýrazıa ýnıversıtetinde úsh jyl eńbek etken.

2011 jyly Germanıanyń Gýmbold qory zertteý stıpendıasyn jeńip alyp, Bonn ýnıversıtetiniń Shyǵystaný ınstıtýtynda Ortalyq Azıanyń tarıhı kartalaryn zertteýmen aınalysty.

Bıyl aqpan aıynan bastap Garvard ýnıversıteti Herbenk zertteý ortalyǵynyń shaqyrýymen tarıhı zertteýlermen aınalysyp jatqan kartograf "Meniń jobamnyń maqsaty 17-19 ǵasyrlardaǵy eýropalyq, orys jáne qytaı ımperıalyq kartalyndaǵy Qazaq handyǵyna qatysty málimetterdi zertteý, sondaı-aq muraǵattyq, tarıhı, etımologıalyq jáne salystyrmaly tildik tásilderdi qoldana otyryp, eýropalyq jáne shyǵys geograftary syzǵan kartalardaǵy málimetterdiń syryn ashý, tarıhı kartalardaǵy, geografıalyq sózdikterdegi Ortalyq Azıa, Batys Sibir jáne Qazaq dalasyndaǵy jer ataýlaryn zertteý" deıdi. 

Garvard ýnıversıteti kitaphanasynda saqtalǵan muraǵat kóleminiń álemde eń úlken ekenin aıtqan profesor sol muraǵattar arqyly zertteý jasaýǵa tolyq múmkindik alǵanyn jetkizdi. Onyń sózinshe, AQSH-tyń ózinde Ortalyq Azıaǵa qatysty 13 myńnan astam tarıhı karta bar.

– Germanıaǵa barǵan soń, tarıhı kartalardy jınaýǵa mol múmkindik aldym. Taıvanǵa, Japonıaǵa, Fransıaǵa arnaýly baryp, muraǵattardan Qazaqstanǵa qatysty kartalardy jınadym, – deıdi kartograf. 

Profesor 2016-2018 jyldarda Nazarbaev ýnıversıtetiniń Áleýmettik jáne gýmanıtarlyq mektebinde ǵalym retinde jumys istegenin tilge tıek etti. Tarıhshy sol jyldary "17-19 ǵasyrlardaǵy Qazaq handyǵyna jáne onyń kórshiles aımaqtaryna qatysty Eýropa-Qytaı ımperıalyq kartalary men geografıalyq sózdikteri" degen taqyrypta Nazarbaev ýnıversıtetiniń atynan  Qazaqstan Bilim jáne ǵylym mınıstrliginiń 2018-2020 jylǵa arnalǵan 3 jyldyq konkýrsqa qatysqanyn aıtady. "Ulttyq ǵylym keńesi jobamdy maquldaǵan joq. Sebebin túsinbedim. Biraq zertteýimdi jalǵastyra berdim" deıdi ǵalym. 

– Meniń ótpeı qalǵan jobamda Qazaq handyǵynyń aýmaǵy men umytylǵan jer attary týraly tyń derekter bar. Tek qazaq jeri, qazaq tarıhy týraly derekter ǵana emes, sol tustaǵy Osman ımperıasy, Noǵaı ordasy, Qazan tatarlary, Bashqurt jeri, Aral ózbekteri, Hıva, Buhara handyǵy, Aýǵan jeri, Qyrǵyz taıpalary, Qyzylbastar ( Persıa) týraly qazirge deıin ǵylymǵa belgisiz tarıhı málimettermen qamdaýshy edi, – dep atap ótti ol.

Jýrnalısiń "Qytaılar Balqashtyń ońtústigi bizdiki deıdi. Bul qanshalyqty negizi bar áńgime?" degen saýalyna tarıhshy "Meniń mınıstrlik jaǵynan toıtarylyp, keri qaıtarylǵan jobam sony pármendi túrde joqqa shyǵaratyn joba bolatyn" deıdi. 

Ǵalym sonymen qatar Eýropa kartalarynda Qazaq handyǵy Qazaqıa dep, al, turǵyndary "qyrǵyzdar" dep te atalǵanyn jetkizdi. 

17-19 ǵasyrlardaǵy eýropalyq kartalarda kezigetin qazaq jerindegi Tatarıa nemese tatar degen etnos tikeleı qazaqtarman qatysty ekenin aıtqan tarıhshy "Eýropa kartalarynda olardy Qazaq Tatarlary deýden syrt Derbes Tatarıa dep te atady. Qazaqqa tán qyz qýý salt-dástúri eýropalyq kartalarda tatarlardyń salt-dástúri dep túsindirildi" deıdi.

– Dúnıejúzi ǵalymdary ımperıa ataýyn keıde Ámir Temir memleketine, tipti, keıde Shaıbanı memleketine de qoldanady. Óıtkeni eki memlekette de ımperıanyń belgileri boldy. Al qazaq handyǵyna ımperıa ataýyn qoldanǵan ǵalymdy keziktirmedim. İs júzinde, Qasym han tusyndaǵy Qazaq handyǵyn ımperıa dep ataýǵa ábden bolady. Óıtkeni Qasym han ımperıa ataýynyń sharttaryn túgel oryndady. Ol Joshy hannan keıingi Joshy áýletinen shyqqan eń myqty han boldy, – deıdi tarıhshy. 

Materıal Garvardtaǵy Ortalyq Azıa stýdentter qaýymdastyǵy saıtyndaǵy (Garvard CASA) jáne AzıaEýropa aqparattyq saraptamalyq jýrnalyndaǵy aqparattar negizinde ázirlendi.