Bilim jáne ǵylym mınıstri Asqat Aımaǵambetov mektep dırektorlaryn taǵaıyndaýdyń jańa tártibin tanystyrdy.
Mınıstrdiń sózinshe, endi mektep dırektorlary birneshe tártippen taǵaıyndalady.
– Birinshiden mektep dırektorynyń mindetin atqarýshysy bolyp 3 aıdan aspaıtyn jáne bir retten artyq emes merzimde ǵana isteýge bolady. Osy kezeńde konkýrs ótkizilip, jańa basshy taǵaıyndalýy kerek. Mektep dırektorynyń bos orny paıda bolǵannan keıin, konkýrs týraly habarlandyrý 7 jumys kúni ishinde bilim basqarmasynyń resmı saıtynda jáne akkaýntynda ornalastyrylýy kerek. Dırektor ýaqytsha (bala kútimine baılanysty demalys, oqý jáne t.b.) ketetin bolsa da konkýrs arqyly taǵaıyndaý bolady. Jáne konkýrsty buryndaǵydaı aýdandyq bilim bólimderi emes, oblystyq bilim basqarmalary ótkizetin bolady. Búginde elimizde mektep basshysy laýazymyna 700-den astam bos jumys orny bar, – dedi Aımaǵambetov.
Baıqaýdyń ózi birneshe kezeńnen turady:
- kandıdattardyń dırektor laýazymyna qujattardy tapsyrýy;
- bilim basqarmasyndaǵy kadr qyzmetiniń kandıdattyń biliktilik talaptaryna sáıkestigin baǵalaýy, konkýrsqa qatysýǵa ruqsat berýi;
- úmitkerlerge arnalǵan elektrondyq testileý (basqarýshylyq quzyretter, pedagogıka, psıhologıa, QR Zańnamasy boıynsha testileý);
- oqý ornynyń Qamqorshylyq keńesiniń aldynda mekteptiń damý josparyn qorǵaý (testileýdi sátti tapsyrǵan jaǵdaıda);
- Bilim basqarmasyndaǵy áńgimelesý (Qamqorshylyq keńesiniń aldynda mekteptiń damý josparyn sátti qorǵap shyqqan úmitkerler jiberiledi).
Sonymen qatar bolashaq dırektorlar mindetti túrde menedjment kýrstarynan ótip, tıisti sertıfıkattary bolýy kerek. Jalpy pedagogıkalyq jumys ótili keminde 5 jyl bolýy qajet.
Barlyq kezeńnen ótken úmitkermen bilim bólimi tıisti eńbek shartyn jasap, ony dırektor etip taǵaıyndaý týraly buıryq shyǵarady.
Taǵy bir jańashyldyq – kadr rezervin qurý. Alǵashqy eki kezeńnen (testileý jáne qamqorshylyq keńespen kelisý) sátti ótken, biraq bilim basqarmasynda áńgimelesýden ótpegen kandıdattar endi bir jylǵa rezervke alynýy múmkin.
Bul kandıdattarǵa mekteptiń qamqorshylyq keńesimen kelise otyryp, bir jyl ishinde dırektor laýazymyna taǵaıyndalý quqyǵy beriledi.
Pikir qaldyrý