Májilis depýtaty Dúısenbaı Turǵanov memleket jáne qoǵam qaıratkeri Sattar Nurmashuly Imashevtiń 100 jyldyǵyna arnalǵan konferensıada onyń ómir joly men elge sińirgen eńbegin erekshe atap ótti.

– Prezıdent Qasym-Jomart Toqaev Abaıdyń mereıtoıyn «toılaý úshin emes, oı tolǵaý úshin ótkiziledi» degen edi. Sol sıaqty Sattar Imashevtiń mereıtoıy – bizdiń halqymyz úshin tereń oılanatyn, taǵylym alatyn kezeń. Ol – el tarıhynda óshpes iz qaldyrǵan, parasatymen tanylǵan tulǵa, – dedi depýtat.

Sattar Imashev – Qazaqstannyń keńestik jáne táýelsiz kezeńderindegi damýyna úles qosqan iri qaıratker. Ol ındýstrıalandyrý, soǵystan keıingi qalpyna keltirý, aýyl sharýashylyǵyn kóterý men áleýmettik ınfraqurylymdy damytý baǵytynda belsendi eńbek etti. Qazaq KSR Joǵarǵy Keńesi Prezıdıýmynyń tóraǵasy retinde elge adal qyzmet etip, áleýmettik ádilettilikti, ulttyq mádenıetti qorǵaýǵa kúsh saldy.

Turǵanov sonymen qatar qaıratkerdiń bilim berý, densaýlyq saqtaý, jastar men áıelderdiń quqyqtaryn keńeıtý, ulttyq dástúr men tildi saqtaý baǵytyndaǵy eńbegin de erekshe atap ótti.

Osyǵan oraı, depýtat mynadaı usynystaryn jetkizdi:

• Astana men Almaty qalalaryndaǵy kóshelerdiń birine Sattar Imashevtiń esimin berý;

• Aqtóbe oblysynda qaıratkerdiń esimin ulyqtaý sharalaryn ótkizý;

• Ál-Farabı atyndaǵy QazUÝ, L.N. Gýmılev atyndaǵy EUÝ jáne H.Dosmuhamedov atyndaǵy Atyraý ýnıversıtetiniń tarıh fakúlteti stýdentterine arnalǵan arnaıy shákirtaqy taǵaıyndaý;

• Almaty qalasyndaǵy Imashev turǵan úıge eskertkish taqta ornatý.

– Qazaqta «Óli rıza bolmaı, tiri baıymaıdy» degen sóz bar. Sattar Nurmashuly – jastar úshin elge adal qyzmet etýdiń jarqyn úlgisi, – dedi depýtat.

Aıta keteıik, konferensıa barysynda qatysýshylar Sattar Imashevtiń saıası murasyn, memleket qurylysy men zańnamany damytýdaǵy rólin jáne qazirgi zaman úshin mańyzyn talqylady.