Alaıaqtyq jáne atqarýshylyq qujatty oryndamaý boıynsha kúdikti Saýd Arabıasynan ekstradısıalandy.
Bas prokýratýranyń málimetinshe, búgin Qazaqstan Respýblıkasynyń Bas prokýratýrasy jáne İİM Interpol qyzmetkerleri Saýd Arabıasy Koróldigindegi Qazaqstannyń Elshiliginiń kómegimen Saýd Arabıasynan alaıaqtyq jáne atqarýshylyq qujatty oryndamaý boıynsha qylmystyq jaýaptylyqqa tartý úshin Qazaqstan azamatyn ekstradısıalady.
Kúdikti 2018-2023 jyldar aralyǵynda aldaý jáne senimdi teris paıdalaný arqyly Almaty qalasynda jábirlenýshilerdiń 19 mıllıon teńge somasyndaǵy aqshalaı qarajaty men múlkin ıemdengen. Sonymen qatar ol uzaq ýaqyt boıy almatylyq komersıalyq kompanıanyń 82 mln teńge somasyna aldyn ala tólengen taýardy jetkizý boıynsha mindettemelerin oryndaýdan jaltarǵan, - delingen habarlamada.
Sotqa deıingi tergeý barysynda kúdiktiniń jasyrynýyna baılanysty oǵan halyqaralyq izdeý jarıalandy.
Osy jyly ol Saýd Arabıasy aýmaǵynda ustalyp, Qazaqstan Respýblıkasy Bas prokýratýrasynyń suraýy boıynsha elge ekstradısıalandy.
Qazirgi ýaqytta kúdikti tergeý ızolátoryna qamaýǵa alyndy. Oǵan taǵylǵan qylmystardy jasaǵany úshin múlkin tárkileýmen bes jyldan on jylǵa deıin bas bostandyǵynan aıyrý jazasy qarastyrylǵan, - dep habarlady Bas prokýratýra.
Aıta ketý kerek, kúdiktiniń ekstradısıasy Qazaqstan Bas prokýratýrasy jasasqan Qazaqstan Respýblıkasy men Saýd Arabıasy Koróldigi arasyndaǵy ekstradısıalaý týraly kelisimniń arqasynda múmkin boldy.
