Qazaqstan jańa eksporttyq baǵyttardy ıgerip, astyq naryǵyndaǵy geografıasyn keńeıtip jatyr. Bul týraly Aýyl sharýashylyǵy mınıstrligi habarlady.

2024–2025 jylǵy maýsymnyń (qyrkúıek–sáýir) qorytyndysy boıynsha, astyq pen un eksporty (astyq balamasynda) shamamen 10 mln tonnaǵa jetip, ótken jylmen salystyrǵanda 37,4%-ǵa artqan. Ádette jyl saıynǵy jóneltilim kólemi 7–8 mln tonna deńgeıinde bolatyn.

– Byltyr dıqandar rekordtyq ónim jınady, bul eksport áleýetin edáýir arttyrdy. Jyl sońyna deıin Qazaqstan shetelge 12 mln tonnaǵa deıin astyq jónelte alady, – delingen mınıstrlik habarlamasynda.

Jańa baǵyttar: Marokko men Vetnam

Mamyr aıynyń sońyna deıin Azyq-túlik kelisimshart korporasıasy Marokkoǵa alǵashqy 60 myń tonna bıdaı jóneltýdi aıaqtamaq. Sonymen qatar, Vetnamǵa 15 myń tonna kólemindegi synamalyq partıany jetkizýge kelisimshart jasaldy.

Eksporttyń dástúrli baǵyttarynda da ósim bar

2024–2025 jyldar aralyǵyndaǵy qyrkúıek–sáýir kezeńinde dástúrli naryqtarǵa jóneltilgen astyq pen un kólemi de aıtarlyqtaı artqan:

• Ózbekstan – 2,6 mln tonnadan 3,3 mln tonnaǵa deıin (+28%)

• Tájikstan – 807,4 myń tonnadan 1,2 mln tonnaǵa deıin (+44%)

• Qyrǵyzstan – 116,6 myń tonnadan 278,1 myń tonnaǵa deıin (2,4 ese ósken)

• Iran – 54 myń tonnadan 889 myń tonnaǵa deıin (16 ese ósken)

• Ázerbaıjan – 5 myń tonnadan 569 myń tonnaǵa deıin (113 ese ósken)

• Aýǵanstan – 202 myń tonnadan 270 myń tonnaǵa deıin (+34%)

Sonymen qatar, Qytaıǵa eksport kólemi 1,8 mln tonnany qurap, ótken maýsymǵa qaraǵanda 27%-ǵa ósti.