Búgin májilis spıkeri Nurlan Nyǵmatýlınniń tóraǵalyǵymen palata búrosy ótip, onda aldaǵy jalpy otyrystyń kún tártibi naqtylandy, dep habarlady mádilistiń baspasóz qyzmeti.

Búro otyrysynda depýtattar qaraýyna Kaspıı teńizi ortasyn qorǵaý jónindegi negizdemelik konvensıaǵa qorshaǵan ortaǵa transshekaralyq turǵydan jasalatyn áserdi baǵalaý jónindegi hattamany ratıfıkasıalaý týraly zań jobasy usynylǵan.

Hattama teńiz ortasy men teńizdiń jaqyndyǵy áserine ushyrap otyrǵan qurlyqtyń lastanýyn boldyrmaý, teńizdiń jaqyndyǵy áserine ushyrap otyrǵan qurlyqqa eleýli transshekaralyq áser etýi múmkin josparlanyp otyrǵan qyzmettiń qorshaǵan ortaǵa áserin baǵalaýdyń tıimdi jáne ashyq rásimderin júrgizýdi kózdeıdi. 

Kún tártibiniń jobasynda qylmystyq jolmen alynǵan kiristerdi zańdastyrýǵa (jylystatýǵa) jáne terorızmdi qarjylandyrýǵa qarsy is-qımyl máseleleri boıynsha zań jobasyn jumysqa alý qarastyrylǵan. Sonymen qatar, palatanyń beıindi komıtetteri birqatar jańa ratıfıkasıalanatyn zań jobalaryn jumysqa almaq. Atap aıtqanda, Múgedekterdiń quqyqtary týraly konvensıaǵa Fakúltatıvtik hattamany jáne Qazaqstan men Reseı úkimetteri arasyndaǵy "Baıqońyr" ǵarysh aılaǵynda "Báıterek" ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkasıalaý týraly zań jobalary bar.