«Nur Otan» partıasynyń Qoǵamdyq saıasat ınstıtýty uıymdastyrǵan «Qazaqstannyń partıalyq-saıası júıesiniń evolúsıasy: syn-qaterler, jetistikter men keleshegi» atty eki kúndik halyqaralyq forým aıasynda sheteldik jáne otandyq sarapshylar, 15 eldiń saıası partıalary men halyqaralyq uıymdarynyń ókilderi óz pikirlerimen bólisýdi jalǵastyrýda.

Ulybrıtanıadan kelgen Halyqaralyq saıası keńesshiler qaýymdastyǵy dırektorlar keńesiniń múshesi Rıchard Mórfı «Nur Otan» partıasy ótkizgen praımerızderdi joǵary baǵalady.
«Praımerız – bul partıa ishindegi úderisterdi demokratıalandyrýǵa baǵyttalǵan óte mańyzdy jáne maǵynaly qadam dep esepteımin. «Nur Otan»-nyń partıaishilik saılaýyna 10 myń kandıdat qatyssa, onyń 40%-y – áıelder, úshten biri – jastar. Bul – maqtanýǵa turarlyq kórsetkish. Partıalar úshin evolúsıa óte mańyzdy. Óıtkeni únemi jańa syn-qaterler paıda bolady, al olarǵa qarsy turý úshin oǵan beıimdelý qajet. Men álemdegi eń kóne jáne tabysty partıa – Brıtandyq Konservatıvtik partıanyń múshesimin. Qazir bul men 40 jyl buryn qosylǵan partıa emes. Ol ózgerdi, ár 10 jyl saıyn ózgeredi. Saıası partıalar adamdardyń kelýin kútip otyra almaıdy, olarǵa ózderi barýlary kerek, proaktıvti bolýy qajet. Biz «Nur Otan»-nyń dál osylaı áreket etetinin kórip otyrmyz jáne onyń bolashaǵy jarqyn bolatynyna senimdimin»», - dep óz oıymen bólisti Ulybrıtanıadan kelgen sarapshy.

Ózbekstannyń Lıberaldy-demokratıalyq partıasynyń ókili Bahtıer Iakýbovtyń pikirinshe, partıaaralyq baılanys eki eldiń jahandyq syn-qaterlerdi eńserýdegi tıimdiligin arttyrady.

«Qazaqstan Táýelsizdiktiń 30 jyly ishinde birtutas qoǵam qalyptastyryp, myqty memleket qurdy. Bul jetistikter sózsiz «Nur Otan» Lıderi Nursultan Nazarbaevtyń esimimen baılanysty. Ótken parlamenttik saılaýdaǵy «Qıyndyqty eńserip, jeńiske birge jetemiz!» degen partıanyń urany onyń jalpy halyqtyń múddesine barynsha arqa súıeýge umtylatynyn áıgileıdi. Biz dostyqqa, tatý kórshilikke jáne strategıalyq seriktestikke negizdelgen ekijaqty qatynastardyń qazirgi joǵary deńgeıine rızashylyq bildiremiz. Sonyń arqasynda biz qazirgi zamannyń jahandyq syn-qaterlerine laıyqty jaýap bere alatynymyzǵa senimdimin», - dep atap ótti Bahtıer Iakýbov.

Aqparat jáne saıası taldaý ortalyǵynyń dırektory, Ortalyq Florıda ýnıversıtetiniń profesory Hoýman Sadrıdiń aıtýynsha, praımerız amerıkandyq partıalyq júıege tán jáne eýropalyq júıege qarama-qaıshy.

«Sebebi Eýropada barlyq máseleler boıynsha túıindi partıa jetekshileri jasaıdy. Sondyqtan, saıasattanýshy retinde men úshin, osy jaǵdaılardyń amerıkandyq jáne eýropalyq júıelerdiń elementterin biriktiretin Qazaqstanda qalaı júzege asyp jatqany zor qyzyǵýshylyq týdyrady», - dedi Hoýman Sadrı.

Reseılik sarapshy, «Valdaı» halyqaralyq pikirtalas klýbynyń baǵdarlamalyq dırektory Tımofeı Bordachóv partıalarǵa jas býynmen aradaǵy dıalogty nyǵaıtýǵa nazar aýdarý qajet dep esepteıdi.

«Meniń oıymsha, Reseı men Qazaqstannyń ortaq múddeleri men bir-birine túsinikti strategıalary bar ekenine eshkimniń kúmán joq. Onyń ishinde partıalyq qurylys jáne saıası uıymdar salasy da bar. Qazir bizde jańa býyn ósip keledi jáne 10 jyldan keıin Reseıdiń syrtqy saıası sheshimderin múldem basqasha oılaıtyn adamdar anyqtaıdy. Olar áldeqaıda pragmatık jandar. Menińshe, eki eldiń jas partıalyq mamandarynyń dıalogy – bizdiń birlesken jumysymyzdyń basty baǵyty», - dep atap ótti Tımofeı Bordachev.

Eske sala keteıik, 600-den astam sheteldik jáne otandyq sarapshylar, saıası partıalardyń, halyqaralyq uıymdardyń jáne 15 eldiń, onyń ishinde Reseı, Qytaı, AQSH, Eýropa, Túrkıa, Ázirbaıjan jáne Ortalyq Azıa dıplomatıalyq korpýsynyń ókilderi saılaý júıelerin damytýdyń ózekti máselelerin, zamanaýı elektoraldyq trendterdi, dástúrli jáne balama ıdeologıalardyń keleshegin talqylaý úshin paneldik sesıalarǵa qatysýda.