«AMANAT» partıasynyń atqarýshy hatshysy Asqat Oralov Túrkistan oblysynda turǵyndarymen, aýyldyq okrýg ákimderimen, partıa aktıvimen, mádenıet qaıratkerlerimen jáne jastarmen birqatar kezdesýler ótkizip, memleket basshysynyń joldaýyn iske asyrý jáne «Jańa Qazaqstandy» qurý mindetterine sáıkes partıany jańǵyrtý máselelerin talqylady.

Saýran aýdanynyń ortalyǵy Shornaq aýylynda «AMANAT» partıasynyń atqarýshy hatshysy Túrkistan oblysyndaǵy birqatar aýyldyq okrýgterdiń, onyń ishinde Maıdantal, Úshqaıyq, Jibek joly, Jańa Iqan jáne t.b. aýyldardyń jańadan saılanǵan ákimderimen kezdesý ótkizdi.

«Memleket basshysy Qasym-Jomart Toqaevtyń bastamasymen byltyr tuńǵysh ret aýyl ákimderin tikeleı saılaý júıesi engizilgen bolatyn. Búginde saılaý naýqany elimiz boıynsha úzdiksiz úderiske aınaldy. Osyǵan deıin Túrkistan oblysynda 72 aýyldyq okrýgte saılaý ótse, sonyń ishinde saılanǵan ákimderdiń 86%-y – «AMANAT» partıasynyń kandıdattary. Bul – partıaǵa artylyp otyrǵan úlken senim. Tıisinshe, bizge saılaýaldy ýádelerdi sapaly oryndaý boıynsha úlken jaýapkershilik júktelip otyr», - dep atap ótti Asqat Oralov.

Óz kezeginde, Shornaq aýylynyń turǵyndary osyndaǵy B.Maılın jáne Q.Dosmetov kóshelerindegi joldyń sapasyna shaǵymdandy. Jergilikti ákimdiktiń málimetinshe, atalǵan kóshelerdi jóndeý úshin búdjetten qarajat bólýge ótinim joldanǵan. Turǵyndardyń shaǵymyn eskere otyryp, Atqarýshy hatshy máslıhattaǵy fraksıaǵa aldaǵy sesıada qarajat bólý máselesin qarap, jóndeý jumystaryn bıyl aıaqtaýdy tapsyrdy.

Budan keıin Asqat Orlov óńirdiń mádenıet qaıratkerlerimen kezdesip, rýhanı qundylyqtardy, ulttyq mádenıet pen ónerdi saqtaý máselelerin talqylady. Kezdesý partıanyń saılaýaldy baǵdarlamasy aıasynda salynǵan Túrkistandaǵy «Farab» kitaphanasynda ótti.

Atqarýshy hatshy partıanyń shyǵarmashylyq jáne óner ókilderine, jas aqyndar men jazýshylarǵa, sondaı-aq kınoındýstrıa ókilderine, aıtystar, konkýrstar, festıválder ótkizý jáne basqa da jobalardy iske asyrý arqyly qoldaý kórsetetinin atap ótti.

«Partıa qaıta jańǵyryp, jańa ıdeıalary bar kóptegen jastardyń kelip jatqany quptarlyq jaǵdaı. Óz tarapymnan, aýyl jastaryn qoldaýǵa erekshe nazar aýdarý qajet dep esepteımin. Aýyl klýbtaryn jańǵyrtyp, ondaǵy kitaphanalardy jańa kitap qorymen baıytyp, túrli úıirmeler ashý kerek. Sonda aýyl jastary bos ýaqytyn tekke ótkizbeı, aýyldaǵy talanttardyń kóptep tanylýyna jol ashar edi», - dep óz pikirimen bólisti Qoja Ahmet Iasaýı atyndaǵy Halyqaralyq qazaq-túrik ýnıversıtetiniń profesory Bekjigit Serdáli.

Osy kúni Asqat Oralov Túrkistan oblysynyń partıa aktıvimen de kezdesip, «AMANAT» modernızasıasynyń basymdyqtaryn talqylady.

Búgingi tańda óńirde barlyq deńgeıdegi máslıhattarda 320 depýtat bolsa, olardyń 82%-y – «AMANAT» partıasynyń músheleri. Jyl basynan beri Túrkistan oblysy boıynsha partıanyń qoǵamdyq qabyldaý bólmelerine 4,3 myńnan astam ótinish kelip túsken. Turǵyndar kóbinese áleýmettik kómek, turǵyn úı-kommýnaldyq sharýashylyq, jumysqa ornalasý jáne densaýlyq saqtaý máseleleri boıynsha keledi. Naýryz aıynan bastap mobıldi qoǵamdyq qabyldaýlar eń shalǵaı aýyldarǵa barýda.

Oblystyq máslıhat depýtaty Nuraly Ábishev oblysta óńirlik saılaýaldy baǵdarlamaǵa enbegen túıindi máseleler bar ekenin alǵa tartyp, olardy sheshý úshin partıa músheleri jergilikti atqarýshy organdarmen, azamattyq sektormen, halyqpen birlesip, odan ári jospar ázirleýi tıis ekenin aıtty.

Jas belsendilermen kezdesý barysynda jergilikti jerlerde jastardy tolǵandyratyn negizgi máseleler talqylandy. Túrkistan oblysynda búgingi tańda «AMANAT» partıasynan Jas depýtattar korpýsyna 35 jasqa deıingi 55 qazaqstandyq kirgen.