Qazaqstannyń soltústigindegi  Petropavl, Pavlodar qalalarynyń atyn aýystyrý bastamasy kóterilip, petısıa iske qosyldy. Petısıa avtory Aslan Abdýlla. Oǵan qazirgi ýaqytta 20 myńǵa jýyq qol jınalǵan. Onyń 13 myńnan astamy bastamany qoldasa, 6500-den astamy qarsy shyqqan. Avtor 100 myń qoldaýshy jınaýdy josparlap otyr.

Máseleni prezıdent qana sheshe alady degen avtor Petropavldy Qyzyljar, Pavlodardy Ertis dep ataý kerektigin aıtady.

Sondaı-aq ol usynylyp otyrǵan ataýlar el arasynda burynnan baryn atap ótip, ataýdyń qos qalaǵa qatysyn tarıhı turǵyda qysqasha túsindirip ótken.

"QYZYLZHAR - "Qyzyljar kóp qazaqqa arman jersiń, Kereıde Tolybaı synshy týyn tigip, Atyńdy "Qyzyljar" dep babam qoıǵan" degen óleń shýmaqtary bar. Al Tolybaı synshy HVİİ ǵasyrda ómir súrgen adam. Bertinirek Qyzyljar qonysyn Atyǵaıdyń Dáýletáli degen baıy meken etkenin Sábıt Muqanov jazdy. "Áýlıe Petr" (Petropavldyń alǵashqy ataýy) qorǵany bolsa tek HVİİİ ǵasyrdyń ekinshi jartysynda salyna bastap, 1770 jyly ǵana aıaqtalǵan. Sol sebepti bul jerde jer ataýy bolmaǵan degen shyndyqqa janaspaıdy.

ERTIS – "Jebe" qoǵamdyq birlestigi Pavlodar qalasynyń ataýyn Ertis dep ózgerýin usynyp otyr. Burynnan kóshpeli qazaq Pavlodar oblysyn Ertis-Baıan óńiri dep atap kelgen. Qazirgi tańda qalada sol ataýdy jańǵyrtýda. Aqparattyq holdıń "Ertis-Medıa" oblystyq "Ertis" telearnasy jáne Olımpıadalyq baseınmen zamanaýı mýltımedıalyq mýzeı "Ertis" atalady" deıdi petısıa avtory.

El arasynda qos qalanyń ataýyn qazaqshalaý týraly áńgime táýelsizdik alǵannan beri kóterilip keledi. Alaıda bılik osy ýaqytqa deıin máseleni kún tártibine qoımaǵan. Muny atalǵan óńirlerdegi ulttyq quramnyń ártúrli bolýy bastamaǵa qarsy reaksıa týdyrýy múmkin, másele ultaralyq sıpat alyp ketýi yqtımal degen saqtyq sharasymen túsindirinder, Reseı yqpalymen baılanystyratyndar bar. Ulttyq quramnyń ártúrliliginen bastamany qoldaýshylarmen qatar, oǵan qarsy shyǵatyndar da kóp bolýy ǵajap emes.