Belgili aqyn, qoǵam qaıratkeri, Qazaqstannyń Eńbek eri Muhtar Shahanovtyń 80 jyldyq mereıtoıy qarsańynda Almatyda Ulttyq qundylyqtar asosıasıasy qoǵamdyq uıymynyń uıymdastyrýymen "Jigerlendirý" atty forým ótti.

İs-shara moderatory jýrnalıs Arman Qudaıbergen forým ataýy aqynnyń óleńimen attas qoıylýy kezdeısoq emestigin, Muhtar Shahanovtyń shyǵarmashylyǵy men qaıratkerligi ulttyń upaıyn túgendeý, múddesin qorǵaýda árkimge árdaıym jiger syılaıtynyn atap ótti.

"Forýmdy ótkizý týraly oı týyndaǵanda el aldynda júrgen azamattardyń basyn bir jerge toǵystyrý qıynǵa soǵatynyn aıtyp, oılarynan aınytpaq bolǵandar, kóńilge kúdik uıatqandar kezdesti" degen ol búgingi forým ulttyq másele degende túrli kózqaras, alýan ustanymdaǵy azamattar, zıaly qaýym ókilderi bir jerge jınala alatyny kórsetkenin málimdedi.

Forým mereıtoı ıesine sóz berýden bastaldy. Muhtar Shahanov jınalǵandarǵa ózin álsiz aqyn sanaıtynyn aıtyp, kelýshilerge alǵys bildirdi. Artynsha biraýyz óleń oqydy.

İzinshe forýmǵa arnaıy shaqyrylǵan spıkerler aqynnyń shyǵarmashylyǵynda arqaý etken, qaıratkerlik qyzmetinde aınalysqan máseleler týraly sóz sóıledi.

Aqyn, fılologıa ǵylymdarynyń doktory Baýyrjan Jaqyp qolyna qalam ustaǵan kez kelgen aqyn Muhtar Shahanovtyń shyǵarmashylyǵyna soqpaı ketpeıtinin atap ótip, kúzde aqynnyń mereıtoıy jazýshylar odaǵy deńgeıinde keń kólemde atalyp ótiletinin jetkizdi. Qazaqstannyń eńbek sińirgen qaıratkeri Asyly Osman aqynnyń qazaq rýhanıatyndaǵy orny men onyń damýyna sińirgen eńbegi týraly aıtty.

Ónertanýshy Erlan Tóleýtaı Muhtar Shahanovtyń aqyndyq prınsıpi men minezine toqtalyp, bılikke udaıy batyl málimdemeler jasap, usynystar bildirip otyrǵanyna, halyqqa unamsyz saıasatyn synap, oıyn ashyq jetkizýden taısalmaǵanyna nazar aýdardy.

Qoǵam belsendisi Muhtar Taıjan aqyn belsene aralasqan qoǵamdyq-saıası ister týraly sóz qozǵady. Ol Muhtar Shahanov Keńes bıligi kezinde Jeltoqsan oqıǵasyna baǵa berý, onyń shyndyǵyn aıtý máselesin bıik minberlerden kótergenin, Naýryz merekesin toılaý úrdisin jandandyrýǵa kúsh salǵanyn, táýelsizdiktiń alǵashqy jyldary memlekettik til máselelesi týraly batyl málimdemeler jasaǵanyn atap ótti.