AQSH prezıdenti Djo Baıden Nú-Iorkte Demokratıalyq partıanyń jıynynda Reseı prezıdenti Vladımır Pýtın "taktıkalyq ıadrolyq nemese hımıalyq, bıologıalyq qarý qoldaný týraly aıtqanda qaljyńdamady" dep tujyrymdaıtyndaı ony jetkilikti dárejede biletinin aıtty.
"Biz "aqyrzaman" qaýpimen Kennedı jáne Kýba zymyran daǵdarysynan keıin betpe-bet kelgen emespiz. Eger osylaı jalǵasa berse, biz shynymen de ıadrolyq qarý qoldaný qaýpimen ushyrasamyz" dep keltirdi Baıdenniń sózin Reuters agenttigi.
1962 jylǵy Kýba daǵdarysy kezinde AQSH prezıdenti Djon Kennedı men Keńes Odaǵynyń birinshi hatshysy Nıkıta Hrýshev Kýbaǵa keńestik zymyrandardyń ornalastyrylýyna baılanysty ıadrolyq qarý qoldanýǵa shaq qalǵan.
Búgin 70 jasqa kelip jatqan Pýtın 21 qyrkúıek kúni ishinara mobılızasıa týraly málimdemesinde Reseıdiń aýmaqtyq tutastyǵyn qorǵaý úshin ıadrolyq qarýǵa júginýge deıin barýǵa ázir ekenin aıtqan. 5 qazanda Pýtın Ýkraınanyń ishinara basyp alynǵan 4 aımaǵyn Reseıge qosý týraly konstıtýsıalyq zańǵa qol qoıǵan.
Lýgansk, Donesk, Herson, Zaparoje oblystarynyń Reseı anneksıalaǵan aýmaǵy Ýkraın jeriniń 15 paıyzyn quraıdy. Reseı anneksıasyn halyqaralyq qaýymdastyq moıyndamaǵanyna qaramastan, Máskeý úshin endi bul jerler Reseıge tıesili. Qyrkúıekten beri orys áskerin shegindirip, basyp alynǵan eldi-mekenderdi birinen keıin birin azat etip kele jatqan Ýkraınanyń qarymta shabýylyn Reseı basqynshylyq dep baǵalap, osy tusta ıadrolyq qarý qoldanýǵa syltaý tabýy yqtımal ekenin sarapshylar aıtyp júr.
Pikir qaldyrý