Búgin Májiliste depýtattar ótken jyldyń qańtar aıynda bolǵan qaıǵyly oqıǵalarǵa qatysty Bas prokýror men quqyq qorǵaý organdary basshylarynyń aqparatyn ekinshi ret tyńdady.

Bul «Jańa Qazaqstan» depýtattyq tobynyń saýalyna aýyzsha jaýap boldy. Otyrys Qańtar oqıǵasy kezinde qaza tapqandardy bir mınýt únsizdikpen eske alýmen bastaldy.

Májilis spıkeri Erlan Qoshanov óz sózinde depýtattarǵa Qańtar oqıǵasy bılikti basyp alýdyń muqıat josparlanǵan áreketi ekenin anyq dáleldeıtin faktiler usynylǵanyn atap ótti. Al ony uıymdastyrýshylar adamdardy jáne beıbit mıtıńilerdi paıdalanyp ketti.

– Bul, ashyǵyn aıtqanda, Táýelsizdikke jasalǵan qastandyq bolatyn! Biraq Prezıdentimizdiń erik-jigeri, halqymyzdyń aqyl-parasaty men birligi, qatardaǵy polıseılerdiń, dárigerlerdiń, eriktilerdiń erligi arqasynda biz memlekettigimizdi qorǵap, beıbereketsizdikke jol bermedik, – dedi Erlan Qoshanov.

Májilis tóraǵasy Qańtar oqıǵasy týraly aqparatty qasaqana burmalaýǵa múddeli toptardyń el ishinde de, syrtynda da bar ekenin atap ótti.

– Birligimizge balta shapqysy keletin, eldigimizge syna qaqqysy keletin revanshısik kúshter az emes. Osyny umytpaıyq. Halyqtyń ádiletti Qazaqstanǵa degen úmiti oıanyp, senimi artyp keledi. Barshamyzdyń aldymyzda burynǵydan da mańyzdy, zor mindetter tur. Biz Qasym-Jomart Kemeluly Toqaev qolǵa alǵan reformalardy iske asyrý jolynda tas-túıin uıysýǵa tıispiz, – dedi Erlan Qoshanov.

Otyrys sońynda Májilis Tóraǵasy Qańtar oqıǵasynyń bolashaqta qaıtalanbaýy úshin sabaq alý mańyzdy ekenin aıtty.

Jalpy otyrysta Bas prokýror, İshki ister mınıstri, qoǵam belsendileri men Májilis depýtattary sóz sóıledi. Sonymen qatar oqıǵanyń bel ortasynda bolyp, sol kúnderdiń tikeleı kýágerleri – polısıa qyzmetkerleri, dárigerler, kásipkerler men eriktiler de pikirimen bólisti.

Úkimet músheleri Qańtar oqıǵasynyń qaıtalanýyn boldyrmaý maqsatymen memleket tarapynan qabyldanyp jatqan sharalar týraly depýtattardyń saýaldaryna jaýap berdi.

Jıyn respýblıkalyq telearna men ınternet arqyly tikeleı efırde kórsetildi.

Jalpy otyrys aldynda tergeý barysynda tabylǵan qarý-jaraq kórmesi uıymdastyryldy.

Sondaı-aq kórmege tártipsizdik kezinde polıseılerdiń búlingen kıimderi – qalqandar, bas kıimder, oq ótkizbeıtin keýdesheler qoıyldy.