Almaty aýmaǵynda úsh saýyqtyrý lageri bar - «Iýnyı Domostroıtel», «Edelveıs» jáne «Almataý», dep habarlaıdy Óńirlik komýnıkasıalar qyzmeti.
Bıylǵy jyly qala syrtyndaǵy lagerlerde 6500-den astam balany, mektep janynda 30 myńnan astam balany saýyqtyrý josparlanyp otyr. Óńirlik komýnıkasıalar qyzmetiniń alańynda saýyqtyrý uıymdaryna qoıylatyn sanıtarlyq-epıdemıologıalyq talaptar jáne balalardyń lagerlerde ýaqyttaryn qaýipsiz ótkizýi talqylandy.
«Balalardyń jazǵy saýyqtyrý uıymdarynda bolý jáne olardy tamaqtandyrý qaýipsizdigin qamtamasyz etý máseleleri ózekti bolyp qala beredi, óıtkeni jappaı tamaqtan ýlaný men ishek ınfeksıalarynyń týyndaý bóliginde sanıtarıalyq-epıdemıologıalyq qaýip tóndiredi. Jazǵy mektep demalysy jaqyndaǵan saıyn jazǵy saýyqtyrý lagerlerin, onyń ishinde mektep janyndaǵy jazǵy alańqaılardy jazǵy saýyqtyrý maýsymyna daıyndaý máseleleriniń ózektiligi atyp otyr», - deıdi Almaty qalasy sanıtarlyq-epıdemıologıalyq baqylaý departamenti basshysynyń orynbasary Gaýhar Katkenova.
Onyń aıtýynsha, juqpaly aýrýlardyń aldyn alý sharalarynyń biri - bilikti jáne gıgıenalyq saýatty qyzmetkerlerdi tańdaý.
Sanıtarıalyq qaǵıdalarda kórsetilgendeı, lager aýmaǵy qorshalǵan bolýy kerek. Sonymen qatar, obektilerde qaýipsiz aýyz sý, ystyq sýmen jabdyqtaý, kanalızasıa, jaryqtandyrý, jeldetý júıelerimen qamtamasyz etilýi tıis.
Barlyq úı-jaılar taza bolýy tıis, jýǵysh jáne dezınfeksıalyq quraldardy qoldana otyryp, kúndelikti tazalaý júrgizilý kerek. Lager jumysy bastalar aldynda kemirgishter men jándikterge qarsy is-sharalar júrgizilýi qajet. Nysandardyń jıhazdary men jabdyqtary balalardyń jas erekshelikterine sáıkes bolýy tıis.
«Jazǵy ýaqytta balalar tez ósedi. Osyǵan baılanysty balalar durys tamaqtanyp, fızıologıalyq erekshelikterin qanaǵattandyrýy kerek. Bul obekt basshysy bekitken perspektıvti mázir jasaýdy kózdeıdi. Qunarlylyǵy boıynsha perspektıvti mázirge engizilgen taǵamdar balalar aǵzasynyń energıa shyǵyndaryn toltyrýy kerek. Tamaq ónimderi men azyq-túlik shıkizatyn qabyldaý olardyń sapasy men qaýipsizdigin kýálandyratyn qujattar bolǵan kezde júzege asyrylady», - dep tolyqtyrdy spıker.
Obektiniń jaýapty adamdary tamaqtandyrý pýnktine qabyldanǵan ónimniń sapasyn, ónimdi saqtaý jaǵdaılaryn jáne merzimderiniń saqtalýyn, táýliktik úlgini tańdaý men saqtaýdyń durystyǵyn, taǵam daıyndaý tehnologıasynyń saqtalýyn, jeke qyzmetkerler men asqana kezekshileriniń gıgıenalyq qaǵıdalardy saqtaýyn tekseredi. Daıyn taǵamdy taratý- medısına qyzmetkeriniń daıyn taǵamdar sapasyna organoleptıkalyq baǵalaý júrgizýinen keıin júzege asyrylýy tıis. Kún saıyn as blogynda daıyn ónimniń táýliktik synamasy alynýy kerek.
Medısına qyzmetkerleri balalardyń syrqattanýshylyǵyn azaıtýǵa jáne densaýlyǵyn jaqsartýǵa baǵyttalǵan saýyqtyrý sharalarynyń keshendi josparyn jasaý kerek.
«Sonymen qatar, úı-jaılardyń, aýmaqtardyń, sýǵa túsý jáne sportpen aınalysý oryndarynyń daıyndyǵyn, balalardyń densaýlyǵyn dınamıkalyq baqylaýdy, dene shynyqtyrý, saýyqtyrý, qyzmetkerlerdiń profılaktıkalyq medısınalyq tekserýden ýaqtyly ótýin qadaǵalanýy tıis. Barlyq qyzmetkerlerdiń jumysqa qabyldanǵany týraly belgisi bar jeke medısınalyq kitapshalary bolý mindetti», - dep bólisti spıker.
Sarapshy balalardyń densaýlyǵy durys teńdestirilgen tamaqtanýmen, durys uıqy, dene shynyqtyrý jáne durys uıymdastyrylǵan kúndelikti kún tártibine tikeleı baılanysty ekenin atap ótti.
«Jazǵy demalys – mektep oqýshylary úshin erekshe yqylaspen kútetin ýaqyt. Jyl boıy bilim nárimen sýsyndaǵan jas jetkinshek, jazǵy demalysta sol jumsaǵan kúshiniń ornyn toltyryp, densaýlyǵyn nyǵaıtyp, aǵzany saýyqtyrý qajet. Sonymen qatar, jazǵy demalys mektep oqýshylarynyń jalpy fızıologıalyq, sana-seziminiń, dúnıetanymynyń damyp, jetilý kezeńi. Sol sebepti de jazǵy demalys kezinde bala úshin densaýlyǵyn nyǵaıtýǵa qolaıly kez dep qarastyrylyp, onyń dara tulǵa bolyp qalyptasýyna jaǵdaı jasaý qajet. Jazǵy demalysta bala ýaqytynyń kóp bóligin teledıdar men kompúterdiń aldynda ótkizbeý úshin ata-analarǵa balalaryn jazǵy saýyqtyrý mekemelerine jiberýge keńes beremiz», - dep keltirdi ol.
