Qyrǵyzstan Qazaqstanǵa baratyn egis sýyn toqtatty. Qyrǵyzstan aýyl sharýashylyǵy mınıstrliginiń aıtýyna qaraǵanda, bul sheshimge eki taraptyń kelisimimen kelgen.

17-19 shildede Bishkekte Qazaqstan men Qyrǵyzstan ókilderi kezdesip, kezdesý kezinde Qazaqstan Kırov sý qoımasynan Jambyl oblysyndaǵy sýarmaly egiske sýdy kóbirek jiberýdi suraǵan. Alaıda endi eki tarap ta kelisimdi buzýdy jón kórip otyr.

"Olar 18-31 shilde aralyǵynda Kırov qoımasynan sekýndyna burynǵydaı 40 tekshe metr emes, 45 tekshe metr sý jiberýdi surady. Biz kóbeıte almaıtynymyzdy, óz egisimizge de jetpeı jatqanyn alǵa tarttyq. Eger 45 tekshe metr sý alatyn bolsa Qazaqstannyń 3,54 mıllıon tekshe metr lımıti 4 tamyzda-aq taýsylady. Qazaqtar sonda da ótinishinen bas tartpady. Sondyqtan eki jaq Qazaqstanǵa egis sýyn tamyzdan bastap toqtatý jóninde hattamaǵa qol qoıdy", - deıdi Qyrǵyzstan aýyl sharýashylyǵy mınıstrligi.

Vedomstvonyń jazýynsha, qazir Qyrǵyzstannyń Talas oblysynda sý tapshylyǵy bolyp jatyr, bul oblysqa Kırov sý qoımasynan sekýndyna 1,3 tekshe metr jiberiledi. Byltyr bul ýaqytta sekýndyna 13,7 tekshe metr sý aǵytylǵan. Bul týraly Azattyq radıosy habarlady. 

Buǵan deıin Qazaqstannyń ekologıa jáne tabıǵı resýrstar mınıstrligi Qyrǵyzstan tamyzdan bastap Jambyl oblysyna baratyn egis sýyn toqtatqanyn, sonyń saldarynan bul óńirdegi aýyl sharýashylyǵy daqyldaryna qaýip tóngenin habarlaǵan. Bul aqparatqa qaraǵanda, 9 tamyzda Kırov sý qoımasynan Talas ózeniniń baseınine 32,48 mıllıon tekshe metr sý jiberilgen, onysy byltyrǵydan (177,28 tekshe metr) 144,8 mıllıon tekshe metr az.