Depýtat máslıhat týraly zańnamanyń jetilmegendigi jáne onyń máslıhat depýtattarynyń ókilettigin shekteıtini, ásirese búdjet jáne resýrstardy bólý máselesinde negizgi kedergi bolatyny týraly aıtty. Máslıhattardy qarjylandyrý da udaıy jetkiliksiz bolyp keledi, bul olardyń jumysyna jáne áleýmettik mańyzy bar jobalardy iske asyrý múmkindigine áser etedi.

Máslıhat depýtattarynyń aldyna halyq múddesiniń bildirý júktelgen, biraq sonymen birge olardyń zańnamalyq jáne ákimshilik deńgeıde múmkindikteri aıtarlyqtaı shektelgen. Máslıhattardyń sheshim qabyldaý ókilettigi, ásirese qarjy jáne búdjet baǵytynda jıi shekteledi. Bul olardyń jergilikti qajettilik pen qoǵamdyq suranystarǵa tıimdi jaýap berý qabiletine keri áser etedi. Jergilikti ózin ózi basqarý derbes desek te máslıhattar atqarýshy bılikke asa táýeldi. Turǵyndar jergilikti basqarý tetikteriniń joqtyǵynan máslıhattardyń tıimdiligi men pármendiligi tómendigin aıtady. Máslıhat apparatynyń qarjylandyrýy tolyqqandy sheshilmegendikten onyń fýnksıalary talapqa saı oryndalmaı otyr, - dedi Bıbıgúl Jeksenbaı.

Depýtat sonymen qatar shalǵaı aýdandardy kadrmen qamtamasyz etý máselesin atap ótti. Azamattar kóbinese máslıhattyń qyzmeti týraly bile bermeıdi jáne sheshim qabyldaýdan syrt qalady, bul jumystyń tıimdiligin tómendetedi. Munyń bári jalpy máslıhat júıesin, olardyń róli men jergilikti qoǵamdastyqtyń damýyna yqpalyn arttyrý úshin reformalaý qajettigin kórsetedi.

Máslıhattardyń jergilikti isterdi basqarýǵa belsendi qatysýǵa múmkindik beretin qosymsha ókilettikter qarastyrý kerek. Atqarýshy jáne ókildi bılik tarmaqtary arasyndaǵy fýnksıalardyń qaıtalanýyn boldyrmaý úshin máslıhattardyń, ákimdikterdiń jáne qoǵamdyq keńesterdiń mindetterin naqty aıqyndaý kerek. Depýtattardyń halyq aldyndaǵy esep berýin depýtattyń saılaý aldy baǵdarlamasymen baılanystyra otyryp bir júıege keltirý kerek, - dedi Bıbıgúl Jeksenbaı.