Buǵan deıin sıfrlyq platformadan joǵalyp ketken qazaq mýzykasy amerıkalyq Meta Instagram korporasıasynyń servısinde qaıta paıda boldy.

Qaznet qoldanýshylary Instagram jelisindegi eski jazbalarynda otandyq oryndaýshylardyń buryn óshirilgen ánderi qaıtarylyp, aýdıotrekterdiń qaıta qoljetimdi bolǵanyn baıqaǵan.

Bul rette Qazaqstan Respýblıkasy Ádilet mınıstrligi Central Media Newske jaǵdaıǵa qatysty túsinikteme bere almaıtyndaryn, sebebi máseleni eki kompanıa: "QazAQ" pen "Meta" sheship jatqanyn aıtty.

Sondaı-aq Qazaqstan avtorlar qoǵamynyń ókilderi osyǵan oraı Ádilet mınıstrliginiń qatysýymen baspasóz máslıhatyn ótkizýge ýáde bergen.

Aıta keteıik, amerıkalyq Meta korporasıasynyń qyzmetterindegi qazaqstandyq mýzykalyq kontent 2024 jyldyń 27 qarashasynan bastap qoljetimsiz boldy. Sondaı-aq paıdalanýshylar otandyq avtorlardyń mýzykasyn izdeý múmkindiginen aıyryldy. Sodan keıin "Meta" olardyń ókilderiniń "QazAQ"-pen kelisimge kele almaǵanyn, sondyqtan osy avtorlar qoǵamynyń katalogyndaǵy barlyq mýzyka Instagram jáne Facebook-te óshirilgenin aıtty.

Áleýmettik jelidegi qoldanýshylardyń narazylyǵynan keıin Ádilet mınıstrligi Meta men Qazaqstan avtorlar qoǵamy arasyndaǵy daýdy sheshýge árekettendi. Ádilet mınıstrligi bul kelispeýshilik jaǵdaıyn buryn-sońdy bolmaǵan dep atady. Vıse-mınıstr Botagóz Jaqselekova taraptar arasyndaǵy kıkiljińdi Qazaqstanda osyǵan uqsas 15 uıymnyń bolýymen túsindirdi jáne Meta olardyń qaısysymen kelisim-shart jasasý kerektigin anyqtaı almaı qınalady. Óıtkeni, kóptegen elderde ártisterdiń avtorlyq quqyqtaryn bir uıym basqarady.