Talǵar aýdanyndaǵy №33 mektep osydan jarty ǵasyr buryn, 1966 jyly salynǵan. 460 oqýshyǵa arnalǵan oqý ornyna qazirgi tańda 1342 bala baryp júr. Alaıda mektep ǵımaratynyń ishi-syrty ábden eskirgen, al sport ınfraqurylymy — múlde nazardan tys qalǵan.
Mektepke jýyrda jergilikti kásipker Elmıra Rýdakova arnaıy kelip, oqý ornynyń qazirgi ahýalymen tanysty. Onyń nazaryn eń aldymen tozyǵy jetken sport alańdary men qaýip tóndiretin eden jabyndary aýdardy. Atap aıtqanda, fýtbol qaqpasynyń torlary jyrtylyp, basketbol saqınalary torsyz kúıde turǵanyn, sport zaldaǵy jabdyqtar da óz qyzmetin atqarýǵa jaramaıtynyn kórip qaıtqan bolatyn.
Balalardyń qaýipsizdigine alańdaǵan kásipker naqty kómek kórsetti
Mekteptegi jaǵdaıǵa beıjaı qaramaǵan kásipker bir synyptyń edenin tolyqtaı jóndep berdi. Buǵan deıingi lınoleýmniń astynda borpyldaq qıyrshyq tastar bolǵan. Úlken tesikter balalardyń oınap júrip, jaraqat alýyna sebep bolýy múmkin edi. Jóndeý jumysy barysynda edenniń beti tegistelip, arnaıy beton kontakt jaǵylyp, ekologıalyq jáne sýǵa tózimdi vınıl jabyndysy tóseldi. Bul materıaldy zeńge, shirýge ushyramaıdy ári aýaǵa zıandy zat bólmeıdi deıdi kásipker.
Aıta keterligi, ıgi iske aýdandyq máslıhat depýtaty Almas Rasylhan muryndyq bolyp, kásipkerdi kómek kórsetýge shaqyrǵan. Jóndelgen synyppen tanysqan mektep dırektory Ámına Smaǵulova basqa synyptardaǵy edenderdiń de jaǵdaıy máz emes ekenin aıtty.
— Biz balalardyń qalada oqyp júrgen zamandastarynan kem túspeýin qalaımyz. Qoldan kelgenshe jaǵdaıdy jaqsartýǵa tyrysyp jatyrmyz. Qazir mektepke kúrdeli jóndeý tek úsh jyldan keıin ǵana josparlanǵan. Sońǵy kúrdeli jóndeý jumysy osydan on jyl buryn jasalǵan, — deıdi mektep basshysy.
Ustazdar óz qaltasynan aqsha shyǵaryp jatyr
Qazirgi kezde mektep ujymy jaǵdaıdy óz kúshimen sheshýge tyrysyp otyr. Óz jalaqysynan aqsha shyǵaryp, jumysshylar jaldap, synyptaryn jóndep júrgen ustazdar da barshylyq. Mysaly, aǵylshyn tili pániniń muǵalimi Aqmaral Jumabekova eden jóndeýge 110 myń teńge jumsaǵan. Alaıda jumys sapasy kóńilinen shyqpapty. Sonyń saldarynan oqýshylar áli de tegis emes edende bilim alýǵa májbúr.
— Balalardyń qaýipsizdigi men oqý jaǵdaıy biz úshin birinshi orynda. Bul ǵımarat qansha jóndelse de, tamyrymen sheshilmeıinshe nátıje bermeıdi. Shyn máninde, balalarǵa jańa ári keń mektep kerek, — deıdi 22 jyldan beri eńbek etip kele jatqan ustaz.
№33 mekteptiń máselesi — jeke bir aýyldyń emes, búkil eldiń ortaq problemasyna aınalǵan bilim salasynyń kórinisi. Ata-analar men ustazdar, kásipkerler men jergilikti bılik birlese qımyldaǵanda ǵana jaǵdaı jaqsaratyny anyq. Qazir mektep basshylyǵy qosymsha ǵımarattar salý úshin ınvestorlar izdestirýde.
Bul bastama ózge de azamattarǵa úlgi bolsa ıgi. Ár balanyń sapaly bilim alýǵa, qaýipsiz ortada ósýge tolyq quqyǵy bar. Al bul quqyqty qamtamasyz etý — qoǵamnyń ortaq mindeti.
