Nú-Iorktegi okrýgtik sot Almaty ákimdigi men "BTA Bank" AQ paıdasyna sheshim shyǵaryp, İlıas Hrapýnovty sotty qurmettemeý aıybymen kináli dep tanydy, dep habarlaıdy Ádilet mınıstrligi.
2025 jylǵy 6 tamyzda AQSH-tyń Nú-Iork Ońtústik okrýgi boıynsha okrýgtik soty jaýapker İlıas Hrapýnovty sotty qurmettemeý aıybymen kináli dep tanyp, talapkerler – Almaty qalasy ákimdigi men "BTA Bank" AQ paıdasyna sheshim shyǵardy.
"Buǵan deıin qabyldanǵan $221,285.31 tóleý jónindegi mindettemege qosa, federaldyq sýdıa Djon G. Kóltl Hrapýnovtyń óz aktıvteri týraly turaqty túrde esep berýdi mindettegen sottyń naqty ári aıqyn buıryǵyn buzǵanyn anyqtady. Mundaı esepterdi usyný mindeti oǵan buryn sotty qurmettemeý aıyby boıynsha kináli dep tanylǵannan keıin júktelgen bolatyn", - dep jazylǵan habarlamada.
Jańa sot sheshimine sáıkes, İlıas Hrapýnov óz aktıvteri jáne oǵan qarsy shyǵarylǵan sot sheshimderin oryndaý úshin aqsha alýǵa jasalǵan áreketter týraly tolyq málimetti turaqty túrde usynýǵa mindetti.
Bul talap oryndalmaǵan jaǵdaıda oǵan qosymsha qarjylyq sanksıalar qoldanylýy múmkin. Sondaı-aq İlıas Hrapýnov Almaty qalasy men BTA Bankke sotty qurmettemeýi saldarynan kelgen shyǵyndy ótep berýge tıis.
