"Býrabaı" Memlekettik ulttyq tabıǵı parkiniń mamandary 2025 jyldyń 14 sáýirinen bastap sporttyq-áýesqoılyq balyq aýlaýǵa arnalǵan joldamalar qaıta iske asyrylatyn, alaıda birqatar shekteýler bar ekendigin málimdedi.
Taratylǵan málimetke súıensek, balyq aýlaýǵa ruqsat etilgen kólder: Býrabaı, Kishi Shabaqty, Qatarkól jáne Tekekól.
Alaıda, birqatar tyıymdar bar:
"Ulttyq parktiń sý aıdyndarynda balyqtardyń ýyldyryq shashý maýsymynyń bastalýyna baılanysty jáne bıoártúrlilikti saqtaý maqsatynda kelesi túrlerge balyq aýlaý tyıym salynady: shortan men kókserke – 15 sáýirden 15 mamyrǵa deıin; tuqy – 20 mamyr men 20 maýsym aralyǵynda",- delingen aqparatta.
Bul erejeni saqtamaǵandarǵa Ákimshilik kodekstiń 383-baby (Balyq aýlaý jáne balyq resýrstaryn jáne basqa da sý janýarlaryn qorǵaý qaǵıdalaryn buzý) boıynsha 10-100 AEK mólsherinde aıyppul salynady.
