Prezıdenttiń aıtýynsha osy qaǵıdatty is júzinde oryndaý úshin mańyzdy sharalar qabyldandy. Ata-ana, mektep jáne memleket kúsh jumyldyryp, bala tárbıesine basa mán bergeni jón. Bul týraly memleket basshysy Qasym-Jomart Toqaev Konstıtýsıanyń 30 jyldyǵyna arnalǵan halyqaralyq ǵylymı-praktıkalyq konferensıada aıtty, dep habarlaıdy Aqorda.
Prezıdenttiń aıtýynsha mektep qabyrǵasynda, joǵary oqý oryndarynda quqyqtyq tárbıe jumysyn kúsheıtý qajet.
"Balalarǵa zańdardy qarapaıym tilmen túsindirgen abzal. Buqaralyq aqparat quraldary men áleýmettik jeli arqyly tıisti jumys júrgizilýi kerek. Jastardyń quqyqtyq sanasyna otbasyndaǵy tárbıe de zor yqpal etedi. Muny eshqashan umytpaýymyz kerek", - dedi Toqaev.
Onyń aıtýynsha ata-ana, mektep jáne memleket kúsh jumyldyryp, bala tárbıesine basa mán bergeni jón. Sonda ǵana zańǵa baǵynatyn, óziniń de, ózgeniń de quqyǵyna qurmetpen qaraıtyn urpaq tárbıeleımiz. Zań men tártip – Ádiletti Qazaqstandy qurýdyń basty alǵysharty.
"Jalpy aıtqanda, biz memlekettik saıasatta tereń ózgeris jasadyq. Konstıtýsıalyq reforma osy aýqymdy jumystyń berik quqyqtyq arqaýy boldy. Sol arqyly saıasatta, ekonomıkada, áleýmettik salada, sot júıesinde "Ádiletti memleket" qaǵıdatyn júzege asyrýǵa jol ashyldy", - deıdi memleket basshysy.
Toqaev Konstıtýsıada jer jáne barlyq tabıǵı resýrs halyqqa tıesili ekeni aıqyn kórsetilgenin atap ótti.
"Osy qaǵıdatty is júzinde oryndaý úshin mańyzdy sharalar qabyldandy. Meniń tapsyrmammen "Ulttyq qor – balalarǵa" baǵdarlamasy ázirlendi. Qordyń jyl saıynǵy ınvestısıalyq tabysynyń jartysy balalardyń arnaıy esepshotyna jiberiletin boldy", - dedi prezıdent.
